Túrkistan oblysynyń ákimdigi Jetisai aýdanynda azamattardyń jeke derekteri zań talaptaryn buza otyryp taratylǵanyn rastady. Oqiǵaǵa bailanysty aýdan ákiminiń orynbasary men bólim basshysyna 200 AEK mólsherinde ákimshilik aiyppul salynǵan. Bul týraly oblys ákiminiń apparaty Dalanews.kz tilshisiniń resmi saýalyna bergen jaýabynda málimdedi.
2026 jylǵy qazanda áleýmettik jelide Jetisai jáne Saryaǵash aýdandaryndaǵy "A" jáne "V" sanattaryna engizilgen azamattardyń jeke derekteri WhatsApp chattarynda tarap ketkeni týraly aqparat jariialanǵan edi. Tizimderde turǵyndardyń JSN-i, mekenjaiy jáne áleýmettik jaǵdaiyna qatysty málimetter bolǵany aityldy.
Osydan keiin oblys ákimdigi ýákiletti organmen birlesip, derekterdiń úshinshi tulǵalarǵa qalai taraǵanyn anyqtaý maqsatynda tekserý júrgizgen.
"Atalǵan derbes derekter Jetisai aýdanyndaǵy azamattardyń turǵylyqty mekenjailaryn naqtylaý úshin qyzmetkerler arasynda taratylǵan. Alaida derbes derekterdi jinaqtaý jáne óńdeý barysynda “Derbes derekter jáne olardy qorǵaý týraly” zań talaptarynyń óreskel buzylýyna jol berilgen", – delingen resmi jaýapta.
Oqiǵaǵa Jasandy intellekt jáne tsifrlyq damý ministrliginiń Aqparattyq qaýipsizdik komiteti quqyqtyq baǵa bergen. Nátijesinde Ákimshilik quqyq buzýshylyq týraly kodekstiń 79-babynyń 2-bóligi boiynsha Jetisai aýdany ákiminiń orynbasary S. Primbekov pen aýdandyq jumyspen qamtý jáne áleýmettik baǵdarlamalar bóliminiń basshysy O. Qanybekovke qatysty hattama toltyrylǵan. Olarǵa 200 AEK mólsherinde ákimshilik aiyppul salyndy.
Budan bólek, oblys ákimdigi atalǵan laýazymdy tulǵalardyń jumys barysynda salǵyrttyq tanytqanyn málimdedi.
"Jetisai aýdany ákimdiginiń kináli laýazymdy tulǵalaryna “sógis” túrindegi tártiptik jaza qoldanyldy", – dep habarlady ákimdik.
Resmi málimetke sáikes, oblystaǵy aýdan jáne qala ákimdikterinde azamattardyń jeke derekteriniń zańsyz taralýyna jol bermeý jóninde túsindirý jumystary júrgizilgen. Bul másele qatań baqylaýǵa alynǵan.
