تٷركييانىڭ ىستانبۇل قالاسىندا 35 جاستاعى قىرعىزستان ازاماتى ايجيبەك نۋرگازى قىزى ادام قولىنان قازا تاپتى. قىلمىسقا كٷدٸكتٸ رەتٸندە تاعى بٸر قىرعىزستاندىق ەيەل ۇستالدى, دەپ dalanews.kz تٸلشٸسٸ BBC-دٸڭ قىرعىز قىزمەتٸنە سٸلتەمە جاساپ حابارلايدى.
قايعىلى وقيعا 5 قاراشا كٷنٸ ىستانبۇلدىڭ اقساراي اۋدانىندا بولعان. قىرعىزستاننىڭ باس كونسۋلدىعى ەكٸ ازاماتتىڭ اراسىندا جانجال تۋىنداپ, ونىڭ سوڭى ادام ٶلٸمٸنە ەكەلگەنٸن راستادى. مارقۇمنىڭ تۋعان ٸنٸسٸ ايداربەك نۋرگازيەۆتٸڭ ايتۋىنشا, ەپكەسٸ تٷركيياعا وسىدان ەكٸ اي بۇرىن عانا قايتا ورالعان.
"ەپكەم ايجيبەك نۋرگازى قىزى 5 قاراشا كٷنٸ تاڭەرتەڭ قايتىس بولىپتى. بٸز بۇل حاباردى قىرعىزستان ۋاقىتىمەن كەشكٸ ساعات 17:00 شاماسىندا ەستٸدٸك. ەپكەم 35 جاستا ەدٸ. تٷركيياعا كەتكەنٸنە ەكٸ اي عانا بولعان. 23 تامىزدا ٶزٸم شىعارىپ سالعان ەدٸم", – دەدٸ ول.
ايداربەكتٸڭ سٶزٸنشە, ەپكەسٸ بۇعان دەيٸن تٷركييادا شامامەن ون جىل جۇمىس ٸستەگەن. كەيٸن قىرعىزستانعا ورالىپ, بٸرنەشە جىل تۋعان ەلٸندە تۇرعان. بيىل تامىز ايىندا قايتادان ىستانبۇلعا جۇمىس ٸستەۋگە كەتكەن.
مارقۇمنىڭ تۋىستارى جانجالدىڭ نەدەن باستالعانىن دا ايتىپ بەردٸ. ايداربەك نۋرگازيەۆتٸڭ مەلٸمەتٸنشە, ەپكەسٸ ىستانبۇلداعى "312" دەپ اتالاتىن سالوندا جۇمىس ٸستەگەن. ول سالون يەسٸنٸڭ پەتەرٸندە ۋاقىتشا تۇرۋعا رۇقسات العان.
قايعىلى وقيعا بولعان كٷنٸ ايجيبەك ۇيىقتاپ جاتقاندا بٶلمەگە باسقا ەيەل كٸرٸپ, تەلەفونمەن قاتتى سٶيلەسە باستاعان. ايجيبەك ەرتەڭٸنە جۇمىسقا بارۋى كەرەكتٸگٸن ايتىپ, ودان تىنىشتىق ساقتاۋىن ٶتٸنگەن.
"ەپكەم ەرتەڭ جۇمىسقا باراتىنىن ايتىپ, اقىرىن سٶيلەۋٸن سۇراعان. ەلگٸ ەيەل بٶلمەدەن شىعىپ كەتٸپ, كەيٸن پىشاقپەن قايتا ورالىپ, ەپكەمنٸڭ جٷرەگٸنە سۇعىپتى. بەتٸنەن دە تەپكٸلەگەن. بٸزدە بولعان وقيعانىڭ بەينەجازبالارى بار", – دەدٸ مارقۇمنىڭ ٸنٸسٸ.
بۇل – مارقۇمنىڭ تۋىسى بايانداعان وقيعا نۇسقاسى. جانجالدىڭ تولىق مەن-جايى تەرگەۋ بارىسىندا انىقتالادى.
قىرعىزستاننىڭ ىستانبۇلداعى باس كونسۋلدىعى وقيعاعا قاتىستى رەسمي مەلٸمدەمە جاسادى.
"2026 جىلعى 5 قاراشادا ىستانبۇل قالاسىنىڭ اقساراي اۋدانىندا قىرعىز رەسپۋبليكاسىنىڭ ەكٸ ازاماتى اراسىندا جانجال تۋىنداپ, سونىڭ سالدارىنان 1991 جىلى تۋعان ا.ن. ەسٸمدٸ ازامات پىشاق جاراقاتىنان قايتىس بولدى. قىلمىسقا كٷدٸكتٸ رەتٸندە 1994 جىلى تۋعان ۆ.س. ەسٸمدٸ ازامات ۇستالدى", – دەلٸنگەن حابارلامادا.
ديپلوماتييالىق ٶكٸلدٸك اتالعان ٸستٸڭ باقىلاۋدا ەكەنٸن مەلٸمدەدٸ. قازٸرگٸ ۋاقىتتا تٷركييانىڭ قۇقىق قورعاۋ ورگاندارى تەرگەۋ جٷرگٸزٸپ جاتىر.
