Jambyl oblysynyń Qordai aýdanyna qarasty Qarakemer aýylynda oqýshylar arasyndaǵy bopsalaý jáne úsh kámeletke tolmaǵan balany ózin-ózi óltirýge deiin jetkizý derekterine qatysty tergeý aiaqtaldy. Qylmystyq is sotqa joldandy, dep habarlaidy dalanews.kz.
Arnaiy prokýrorlardyń málimetinshe, tergeý barysynda aýyl mektepteriniń oqýshylary arasynda «Sistema» dep atalatyn beiresmi qurylymnyń bolǵany anyqtalǵan. Onyń ózindik ierarhiiasy, minez-qulyq pen baǵyný erejeleri, sondai-aq tártip buzǵandardy jazalaý tártibi bolǵan.
Jinalǵan dálelder bopsalaý áreketteri men úsh jasóspirimniń qazasy arasynda sebep-saldarlyq bailanys bar ekenin kórsetken. Osy iske bailanysty eki kúdiktige Qylmystyq kodekstiń 194-baby 2-bóliginiń 1), 2), 3)-tarmaqtary (qorqytyp alý) jáne 105-babynyń 2-bóligi (ózin-ózi óltirýge deiin jetkizý) boiynsha aiyp taǵyldy. Ekeýi de qamaýǵa alynǵan.
Taǵy bes kúdiktiniń áreketi qorqytyp alý baby boiynsha saralanyp, olarǵa qatysty ózge bultartpaý sharalary qoldanylǵan. Qazirgi ýaqytta «Sistema» dep atalǵan beiresmi qurylymnyń qyzmeti toqtatylǵan. Sonymen qatar prokýrorlar quqyq buzýshylyqtarǵa jol bergen quzyrly organdardyń áreketterine quqyqtyq baǵa berip, mundai jaǵdailarǵa sebep bolǵan faktorlardy joiý týraly usynystar engizgen. Olar qazir qaralyp jatyr.
2026 jylǵy 23 qazanda qylmystyq is máni boiynsha qaraý úshin Jambyl oblysynyń kámeletke tolmaǵandardyń isteri jónindegi mamandandyrylǵan aýdanaralyq sotyna joldandy. Aiyptalýshylardyń kinási sottyń zańdy kúshine engen úkimimen ǵana anyqtalady. Qylmystyq-protsestik kodekstiń 201-babyna sáikes, sotqa deiingi tergep-tekserýdiń ózge málimetteri jariia etilmeidi.
