Áleýmettik jelide Taraz qant zaýytyn reseilik kásipkerler satyp alýy múmkin degen aqparat tarady. Sonymen qatar kásiporyndy jańǵyrtýǵa 12,4 mlrd teńge jumsalǵany aityldy. Dalanews.kz zaýyttyń satylýyna qatysty málimetti naqtylaý jáne jańǵyrtý jumystarynyń qalai qarjylandyrylǵanyn bilý úshin Jambyl oblysynyń ákimdigine resmi saýal joldady.
Oqiǵa qalai órbidi?
Facebook belsendisi Ońǵar Qabden áleýmettik jelidegi paraqshasynda Taraz qant zaýytyn reseilik kásipkerler – Demidovtar satyp alýy múmkin ekenin jazdy. Onyń sózinshe, kásiporyndy jańǵyrtýǵa biýdjetten qarajat bólingeni jóninde de áńgime taraǵan.
Osyǵan bailanysty belsendi Jambyl oblysynyń ákimi Erbol Qarashókeevke saýal joldap, jańǵyrtýǵa jumsalǵan 12,4 mlrd teńgeniń qansha bóligi respýblikalyq jáne jergilikti biýdjetten, al qanshasy jeke investitsiia esebinen bólingenin surady. Sondai-aq joba aiasynda memlekettik sýbsidiia, jeńildetilgen nesie nemese basqa da qarjylyq qoldaý kórsetilgen-kórsetilmegenin naqtylaýdy ótindi.
Dalanews.kz redaktsiiasy da ákimdikten yqtimal mámile, qarjylandyrý kózderi jáne kórsetilgen memlekettik qoldaý týraly aqparat berýdi surady.
Zaýytqa 6 mlrd teńge nesie berilgen
Jambyl oblysy ákimdiginiń kásipkerlik jáne indýstrialdy-innovatsiialyq damytý basqarmasy Taraz qant zaýytyna 2024-2025 jyldary 6 mlrd teńge nesie berilgenin habarlady.
Qarajat “Qarapaiym zattar ekonomikasy” jáne “Kásipkerlikti qoldaýdyń biryńǵai keshendi baǵdarlamasy” aiasynda Qazaqstan Halyq banki arqyly bólingen.
“”Taraz qant zaýyty” JShS-ne 2024–2025 jyldar aralyǵynda “Qarapaiym zattar ekonomikasy” jáne “Kásipkerlikti qoldaýdyń biryńǵai keshendi baǵdarlamasy” aiasynda “Qazaqstan Halyq banki” AQ arqyly 6 mlrd teńge nesie berildi”, – delingen resmi jaýapta.
Alaida ákimdik áleýmettik jelide aitylǵan 12,4 mlrd teńgeniń tolyq qurylymyn ashyp kórsetpedi. Atap aitqanda, qalǵan 6,4 mlrd teńgeniń kásiporynnyń óz qarajaty, jeke investitsiia nemese basqa qarjy kózi esebinen bólingeni naqtylanbaǵan.
Basqarmanyń málimetinshe, zaýytqa gaz, elektr energiiasy jáne ózge de qajetti infraqurylym tartýǵa bailanysty memlekettik qoldaý kórsetilmegen.
Kásiporyn bir jyldan astam ýaqyt toqtap turǵan
Resmi jaýapqa sáikes, jańǵyrtý jumystaryna bailanysty Taraz qant zaýyty 2025 jylǵy 10 shildeden 2026 jylǵy qazanǵa deiin jumysyn toqtatqan.
Kásiporyn 2026 jylǵy 25 qazannan bastap qant qyzylshasyn qaita qabyldai bastaǵan. Qant óndirisin qarasha aiynda iske qosý josparlanǵan.
“2026 jyldyń 25 qazanynan bastap zaýyt qant qyzylshasyn qabyldaýdy bastady. Qant óndirisin qarasha aiynda bastaýdy josparlap otyr”, – dep habarlady basqarma.
Degenmen ákimdiktiń jaýabynda jańǵyrtý kezinde naqty qandai jumystar atqarylǵany, óndiristik qýattyń qanshalyqty artqany jáne nesie qarajatynyń qandai maqsattarǵa jumsalǵany kórsetilmegen.
Satylymǵa qatysty naqty jaýap joq
Redaktsiia ákimdikten Taraz qant zaýytyn reseilik kásipkerler satyp alady degen aqparattyń ras-ótirigin surady. Sonymen qatar kelissóz júrgizilip jatsa, áleýetti satyp alýshynyń kim ekenin jáne mámileniń qai kezeńde turǵanyn naqtylaýdy ótindi.
Alaida basqarma bul suraqtarǵa jaýap berý óziniń quzyretine jatpaitynyn málimdedi.
“Áleýmettik jelilerde “Taraz qant zaýyty” JShS-ne qatysty jariialanǵan basqa suraqtarǵa jaýap berý basqarmanyń quzyryna jatpaidy”, – delingen resmi hatta.
