Жамбыл облысының Қордай ауданына қарасты Қаракемер ауылында оқушылар арасындағы бопсалау және үш кәмелетке толмаған баланы өзін-өзі өлтіруге дейін жеткізу деректеріне қатысты тергеу аяқталды. Қылмыстық іс сотқа жолданды, деп хабарлайды dalanews.kz.
Арнайы прокурорлардың мәліметінше, тергеу барысында ауыл мектептерінің оқушылары арасында «Система» деп аталатын бейресми құрылымның болғаны анықталған. Оның өзіндік иерархиясы, мінез-құлық пен бағыну ережелері, сондай-ақ тәртіп бұзғандарды жазалау тәртібі болған.
Жиналған дәлелдер бопсалау әрекеттері мен үш жасөспірімнің қазасы арасында себеп-салдарлық байланыс бар екенін көрсеткен. Осы іске байланысты екі күдіктіге Қылмыстық кодекстің 194-бабы 2-бөлігінің 1), 2), 3)-тармақтары (қорқытып алу) және 105-бабының 2-бөлігі (өзін-өзі өлтіруге дейін жеткізу) бойынша айып тағылды. Екеуі де қамауға алынған.
Тағы бес күдіктінің әрекеті қорқытып алу бабы бойынша сараланып, оларға қатысты өзге бұлтартпау шаралары қолданылған. Қазіргі уақытта «Система» деп аталған бейресми құрылымның қызметі тоқтатылған. Сонымен қатар прокурорлар құқық бұзушылықтарға жол берген құзырлы органдардың әрекеттеріне құқықтық баға беріп, мұндай жағдайларға себеп болған факторларды жою туралы ұсыныстар енгізген. Олар қазір қаралып жатыр.
2026 жылғы 23 қазанда қылмыстық іс мәні бойынша қарау үшін Жамбыл облысының кәмелетке толмағандардың істері жөніндегі мамандандырылған ауданаралық сотына жолданды. Айыпталушылардың кінәсі соттың заңды күшіне енген үкімімен ғана анықталады. Қылмыстық-процестік кодекстің 201-бабына сәйкес, сотқа дейінгі тергеп-тексерудің өзге мәліметтері жария етілмейді.
