Iran astanasy Tegeranda keptirilgen jemis-jidek pen jańǵaq satatyn dúken iesi syrt kelbetiniń Izrail premer-ministri Biniamin Netaniahýǵa uqsastyǵy úshin áleýmettik jelide qyzý talqyǵa tústi. Keibir qoldanýshylar turǵyndardy onyń dúkeninen saýda jasamaýǵa shaqyrǵan. Bul týraly túrkiialyq Haberler basylymy jazdy, dep habarlaidy dalanews.kz.
Áleýmettik jelilerde taraǵan videoda egde jastaǵy er adamnyń dúkeninde tarazynyń artynda otyrǵany kórinedi. Jeli qoldanýshylary onyń shash úlgisi, bet-álpeti men mimikasy Izrail premer-ministrine qatty uqsaitynyn baiqaǵan.
Beinejazba qysqa ýaqyt ishinde Iran men arab elderiniń áleýmettik jelilerinde keńinen tarady. Biri er adamnyń Netaniahýǵa uqsastyǵyna ázilmen qarasa, endi biri dúkenniń naqty mekenjaiyn suraǵan. Keibir qoldanýshylar tipti arnaiy baryp, odan saýda jasaǵysy keletinin jazǵan.
Dúkendi boikottaýǵa shaqyrdy
Alaida jelidegi reaktsiianyń bári birdei jaǵymdy bolmaǵan. Túrkiialyq BAQ-tyń habarlaýynsha, keibir qoldanýshylar er adamnyń Izrail premer-ministrine uqsaitynyn alǵa tartyp, onyń dúkeninen taýar satyp almaýǵa shaqyrǵan.
Birqatar jariialanymda mundai úndeýler dúken iesiniń klientterinen aiyrylýyna áser etkeni aitylǵan. Sondai-aq keibir derekkózder satýshynyń kútpegen jaǵdaiǵa bailanysty narazylyǵyn bildirgenin jazǵan. Degenmen onyń óz aýzynan aitylǵan málimdeme nemese biznesine kelgen shyǵyn týraly naqty derek jariialanbaǵan.
Dúken iesiniń kim ekeni belgisiz
Ázirge er adamnyń jeke basy, dúkeniniń naqty ornalasqan jeri jáne videodaǵy kadrlardyń qashan túsirilgeni anyqtalǵan joq. Áleýmettik jelilerde onyń esimi týraly túrli boljamdar taraǵanymen, bul aqparat senimdi derekkózder arqyly rastalmaǵan.
Izraildik Israel Hayom basylymy da videodaǵy kadrlardyń túpnusqalyǵyn óz betinshe teksere almaǵanyn jazdy.
Oqiǵa Iran men Izrail arasyndaǵy uzaq ýaqyttan beri jalǵasyp kele jatqan saiasi shielenis aiasynda órbidi. Osylaisha, qarapaiym satýshynyń syrt kelbeti áleýmettik jelide ázilge ainalyp qana qoimai, onyń kásibine qatysty boikot úndeýleriniń taraýyna da sebep bolǵan.
