Almaty oblysyndaǵy Sharyn shatqaly 2026 jylǵy The Worldworthy 100 halyqaralyq reitinginde 17-orynǵa ie boldy. Sonymen qatar ol óz sanatynda Qazaqstannyń úzdik tabiǵi nysany dep tanyldy, dep habarlaidy dalanews.kz.
Halyqaralyq reitingke álemniń 46 elinen 100 kanon men shatqal engen. Sharyn shatqaly Worldworthy baǵalaý júiesi boiynsha 10 baldyń 9,48 balyn jinap, 17-orynǵa turaqtaǵan.
Salystyrmaly túrde aitsaq, AQSh-taǵy áigili Úlken kanon (Grand Canyon) reitingte tórtinshi orynǵa jaiǵasqan. Al tizimniń kóshin Niý-Iork shtatyndaǵy Letchvort shatqaly bastaǵan.
The Worldworthy 100 reitingi kelýshilerdiń pikirleri men usynystary, halyqaralyq týristik gidter men buqaralyq aqparat quraldaryndaǵy jariialanymdar, sondai-aq ashyq derekkózder negizinde jasalady. Qorytyndy nátijeler redaktsiialyq tekserýden ótedi.
Sharyn shatqaly milliondaǵan jyl boiy qalyptasqan jartasty bederimen, erekshe geologiialyq qurylymdarymen jáne kórkem tabiǵatymen tanymal.
Orman sharýashylyǵy jáne janýarlar dúniesi komitetiniń málimetinshe, Worldworthy redaktsiiasy Sharyn memlekettik ulttyq tabiǵi parkine halyqaralyq reiting laýreatynyń arnaiy sertifikatyn joldaǵan.
Sharyn shatqalynyń álemdegi úzdik tabiǵi nysandar qataryna enýi Qazaqstannyń týristik áleýetin tanytýǵa jáne biregei tabiǵi murasyn saqtaýǵa degen halyqaralyq qyzyǵýshylyqty arttyrýǵa múmkindik beredi.
