Qazaqstan Joǵarǵy Sotynyń sýdiasy qyzmetine Asan Eskendirov sailandy. Onyń kandidatýrasyn Memleket basshysy Qasym-Jomart Toqaev usynyp, Quryltai depýtattary qoldaý bildirdi, dep habarlaidy dalanews.kz.
11 qarashada ótken Quryltaidyń jalpy otyrysynda Joǵarǵy Sot sýdiasyn sailaý máselesi qaraldy.
Qazaqstan Respýblikasy Konstitýtsiiasynyń 56-babynyń 10-tarmaqshasyna sáikes, Joǵarǵy Sottyń sýdialary Prezidenttiń usynýymen Quryltaida sailanady.
Memleket basshysynyń Asan Eskendirovke qatysty usynysyn depýtattarǵa Joǵary Sot Keńesiniń tóraǵasy Dmitrii Malahov tanystyrdy.
Ol kandidattyń sot júiesindegi tájiribesine toqtalyp, uzaq jyldar boiy túrli deńgeidegi sottarda qyzmet atqarǵanyn atap ótti.
"Quryltai qaraýyna Joǵarǵy Sot sýdiasy laýazymyna Asan Eskendirovti sailaý týraly Memleket basshysynyń usynymy engizildi. Asan Qairýllauly 30 jyldan astam ýaqyt boiy barlyq sot instantsiialarynda qyzmet etti... Osy oraida bul usynymdy qoldaýlaryńyzdy suraimyn", – dedi Dmitrii Malahov.
Jalpy otyrysta depýtattar usynylǵan kandidatýrany qoldady. Nátijesinde Asan Eskendirov Qazaqstan Respýblikasy Joǵarǵy Sotynyń sýdiasy bolyp sailandy.
Asan Eskendirov kim?
Asan Qairýllauly Eskendirov 1971 jyly dúniege kelgen. 1996 jyly E.A. Bóketov atyndaǵy Qaraǵandy memlekettik ýniversitetin támamdaǵan.
Eńbek jolyn 1991 jyly Kókshetaý oblystyq Ishki ister departamentinde sarapshy bolyp bastaǵan. Bul qyzmetti 1994 jylǵa deiin atqarǵan.
1994-1996 jyldary Kókshetaý oblysynyń Ádilet departamentinde keńesshi, jetekshi maman jáne bas maman laýazymdarynda jumys istedi.
1996 jyly Kókshetaý qalalyq sotynyń sýdiasy bolyp taǵaiyndalyp, sot júiesindegi qyzmetin bastaǵan.
Keiin 1998-1999 jyldary Astana qalasynyń Almaty aýdandyq sotynda, al 1999–2002 jyldary Aqmola oblystyq sotynda sýdia qyzmetin atqardy.
2002 jyldan bastap Aqmola oblysynyń mamandandyrylǵan aýdanaralyq ekonomikalyq sotyn basqardy. Bul qyzmette 2008 jylǵa deiin eńbek etti.
2008-2012 jyldary Pavlodar oblysynyń mamandandyrylǵan aýdanaralyq ekonomikalyq sotynyń tóraǵasy boldy.
Al 2012 jylǵy shildeden 2015 jylǵy jeltoqsanǵa deiin Aqmola oblystyq sotynyń azamattyq jáne ákimshilik ister jónindegi apelliatsiialyq sot alqasyna jetekshilik etti.
Budan keiin Asan Eskendirov Qazaqstan Joǵarǵy Sotynyń sýdiasy bolyp qyzmet atqardy.
2022 jyldyń jeltoqsanynda ol Qazaqstan Respýblikasy Konstitýtsiialyq Sotynyń sýdiasy laýazymyna taǵaiyndalǵan.
