Qazaqstanda bilim berý uiymdaryn tsifrlandyrý, mektepterde Face ID júiesin engizý jáne balabaqshalardy qarjylandyrý tártibin jetildirý máseleleri qaraldy. Premer-ministrdiń birinshi orynbasary Nurlybek Nálibaev jaýapty memlekettik organdarǵa birqatar tapsyrma berdi, dep habarlaidy dalanews.kz.
Úkimette ótken keńeste Ulttyq bilim berý derekter qoryn jańǵyrtý, bilim berý salasyna tsifrlyq tehnologiialardy engizý jáne memlekettik qarjylandyrýdyń tiimdiligin arttyrý máseleleri talqylandy.
Jiynǵa oqý-aǵartý ministri Juldyz Súleimenova, oblystardyń, sondai-aq Astana, Almaty jáne Shymkent qalalary ákimderiniń orynbasarlary qatysty.
Qazaqstanda Ulttyq bilim berý platformasy iske qosylady
Úkimettiń málimetinshe, Oqý-aǵartý ministrligi "Qazaqtelekom" AQ-men birlesip, óńirlerdi Ulttyq bilim berý platformasyna kezeń-kezeńimen qosý josparyn ázirlegen.
Jańa júie bilim berý salasyndaǵy memlekettik qyzmetterdi avtomattandyrýǵa jáne aqparattyq derekterdiń naqtylyǵyn arttyrýǵa baǵyttalǵan. Sonymen qatar platforma bilim berý uiymdaryna bólinetin biýdjet qarajatynyń jumsalýyn baqylaýdy kúsheitip, qarjylandyrý úderisiniń ashyqtyǵyn qamtamasyz etýge múmkindik beredi dep kútilýde.
Balabaqshalardy qarjylandyrý tártibi ózgerýi múmkin
Keńeste mektepke deiingi bilim berý uiymdaryn qarjylandyrý máselesine de erekshe nazar aýdaryldy. Atap aitqanda, balabaqshalarǵa bólinetin memlekettik bilim berý tapsyrysynyń qunyn esepteýdiń biryńǵai ádistemesin engizý usynysy qaraldy.
Qazirgi tańda óńirlerdegi bilim berý qyzmetteriniń quny men shyǵyndary bir-birinen erekshelenedi. Osyǵan bailanysty memlekettik tapsyrysty esepteý kezinde aimaqtyq erekshelikterdi eskerý qajettigi aityldy.
Nurlybek Nálibaev jaýapty memlekettik organdarǵa bir tárbielenýshige shaqqandaǵy memlekettik bilim berý tapsyrysynyń bazalyq qunyn respýblikalyq deńgeide belgileý múmkindigin qarastyrýdy tapsyrdy. Bul rette óńirlerdiń ekonomikalyq erekshelikteri men naqty shyǵyndaryn eskeretin arnaiy túzetý koeffitsientterin qoldaný usynyldy.
Mektepterde Face ID júiesin jappai engizý josparlanyp otyr
Jiynda bilim berý uiymdarynyń qaýipsizdigin kúsheitý máselesi de kóterildi. Osy maqsatta mektepter men basqa da bilim berý mekemelerinde Face ID tehnologiiasyna negizdelgen kirýdi baqylaý júielerin keńinen engizý qajettigi aityldy.
Mundai júieler bilim berý uiymdarynyń aýmaǵyna kirip-shyǵatyn adamdardy baqylaýǵa, oqýshylardyń sabaqqa qatysýyn avtomatty túrde tirkeýge jáne qaýipsizdik deńgeiin arttyrýǵa baǵyttalǵan.
Face ID tehnologiiasy arqyly oqýshylardyń bilim berý uiymyna kelgen-kelmegenin esepke alý úderisin avtomattandyrý kózdelip otyr. Degenmen júieniń naqty qashan jáne qandai kezeńdermen engiziletini týraly aqparat jariialanǵan joq.
Ákimdikterge birqatar tapsyrma berildi
Keńes qorytyndysy boiynsha Nurlybek Nálibaev jaýapty ministrlikter men óńirlik ákimdikterge bilim berý salasyn odan ári tsifrlandyrý jóninde tapsyrmalar júktedi.
Negizgi mindetterdiń qatarynda Ulttyq bilim berý platformasyn engizý, memlekettik qarjylandyrýdyń tiimdiligin arttyrý jáne bilim berý uiymdaryndaǵy qaýipsizdik júielerin jetildirý bar.
Úkimet bul sharalar bilim berý júiesindegi basqarý úderisterin ońtailandyryp, biýdjet qarajatyn paidalanýdyń ashyqtyǵyn arttyrýǵa baǵyttalǵanyn atap ótti.
