Shymkent qalasynda kópqabatty turǵyn úiden órt shyǵyp, 67 jastaǵy er adam kóz jumdy. Kórshileriniń aitýynsha, marqum tósekte temeki shegip jatyp uiyqtap qalǵan bolýy múmkin, dep habarlaidy dalanews.kz.
Qaiǵyly oqiǵa túngi ýaqytta Shymkenttiń Teriskei shaǵyn aýdanyndaǵy kópqabatty úilerdiń birinde bolǵan. Aldymen turǵyndar úshinshi qabattaǵy páterden shyqqan tútinniń iisin sezgen. Olar úi iesine habar berý úshin esigin qaqqanymen, ishten eshkim jaýap qatpaǵan.
Keiin oqiǵa ornyna órt sóndirýshiler shaqyrylǵan. Tótenshe jaǵdailar qyzmetiniń mamandary turǵyn úige jedel jetip, adamdardy qaýipsiz jerge shyǵarýǵa kirisken. Órt kezinde ǵimarattan segiz adam evakýatsiialanǵan.
Qutqarýshylar órtenip jatqan páterdiń esigin buzyp ashqan. Órtti sóndirý barysynda úi ishinen 67 jastaǵy er adamnyń máiiti tabylǵan. Onyń denesin ot sharpyǵan.
Kórshileriniń aitýynsha, qaitys bolǵan er adam páterde jalǵyz turǵan. Turǵyndar onyń ishimdik ishetinin aityp, órttiń shyǵýyna temeki tuqyly sebep bolýy múmkin degen boljam bildirgen. Marqumnyń kórshisi Uljan Qartanova bolǵan jaǵdai týraly aityp berdi.
"Jalǵyzbasty er adam, bir ózi turatyn. Bala-shaǵasyn bilmeimin, bar ma, joq pa... Turǵanyna tórt jyldai bolyp qaldy. Únemi araq ishetin. Temeki shegip jatyp uiyqtap qalyp, aiaǵy órtenip qaitys bolǵan", – dedi ol.
