Er adam boijetkenmen biyl qańtar aiynda internet arqyly tanysyp, keiin ekeýi kezdesip júrgen. Alaida biraz ýaqyttan soń qyz qarym-qatynasty toqtatýǵa sheshim qabyldap, Tailandqa ushýdy josparlaǵan, dep habarlaidy dalanews.kz.
Kriminalnyi Kazahstan derekkóziniń málimetinshe, 4 aqpanda olar qaita kezdesip, boijetken ýaqytsha turyp jatqan qurbysynyń páterine barǵan. Is materialdaryna sáikes, sol jerde er adam ony tunshyqtyryp óltirgen.
Qylmystan keiin ol marqumnyń bank shotyndaǵy aqshany óziniń dosyna aýdaryp, taksi shaqyryp, oqiǵa ornynan ketip qalǵan. Dosy qarajattyń ne úshin jiberilgenin suraǵanda, kúdikti jaýap ornyna smailik joldaǵan.
Kelesi kúni ol dosynan aqshany qolma-qol sheship berýdi ótinip, Tarazǵa ketpek bolǵan. Alaida jolda politsiia qyzmetkerleri ony ustady. Osy ýaqytta boijetkenniń denesin ápkesi men qurbysy taýyp úlgergen edi.
Sottalýshy aqshany iemdengenin moiyndaǵanymen, adam óltirý babyn abaisyzda kisi ólimine ákep soqtyrý dep ózgertýdi suraǵan. Sot onyń bul ýájimen kelispei, 10 jylǵa bas bostandyǵynan aiyrdy.
Úkim zańdy kúshine endi. Al marqumnyń ápkesi taǵaiyndalǵan jazany tym jeńil dep esepteidi.
