Almatydaǵy Respýblikalyq fizika-matematika mektebi (RFMM) filialynyń direktory qyzmetinen ketti. Qazan aiynda atalǵan mekteptiń 58 oqýshysy jiti ishek infektsiiasynyń belgilerimen aýrýhanaǵa jatqyzylǵan bolatyn, dep habarlaidy dalanews.kz.
Oqý ornynyń baspasóz qyzmeti basshynyń óz erkimen jumystan ketkenin habarlady.
Kadrlyq ózgerister týraly jýrnalist Mihail Kozachkov ta málimdedi. Onyń aitýynsha, mektep ázirge tolyqqandy dástúrli oqý formatyna oralmaǵan. Basqa qalalardan kelgen oqýshylardy internatqa ornalastyrý áli múmkin bolmai otyr. Sebebi ashana jumysy qalpyna keltirilmegen. Al internatta turatyn oqýshylardy tamaqpen qamtamasyz etý – mindetti talaptardyń biri.
Ata-analar chatyna jiberilgen habarlamaǵa sáikes, 16 qarashadan bastap mektep sabaqty gibrid formatta ótkizýdi josparlap otyr. Qalada turatyn oqýshylar mektepke baryp oqysa, internatta turatyn balalar qashyqtan bilim alady.
Al basqa qalalardan kelgen oqýshylardy internatqa ornalastyrý 22 qarashaǵa josparlanǵan. Degenmen bul merzim ashananyń daiyn bolýyna jáne qaýipsizdik talaptarynyń oryndalýyna bailanysty ózgerýi múmkin.
«Oqýshylardyń internatqa kelýiniń boljamdy kúni – 22 qarasha. Bul kún aldyn ala belgilengenin eskerýlerińizdi suraimyz. Merzim ashananyń daiyn bolýyna jáne balalardyń qaýipsiz jaǵdaida turýyna qajetti talaptardyń oryndalýyna bailanysty bolady», – delingen habarlamada.
Sondai-aq mektep direktory A. M. Kúngojin 9 qarasha kúni saǵat 18:00-de ata-analar komiteti tóraǵalarynyń jinalysyna qatysyp, qalyptasqan jaǵdai, aldaǵy josparlar men uiymdastyrý máseleleri týraly aqparat berýi tiis.
RFMM-de ne bolǵan edi?
2026 jylǵy 12 qazanda Almatydaǵy Balalar qalalyq klinikalyq infektsiialyq aýrýhanasyna jiti ishek infektsiiasynyń belgilerimen oqýshylar túse bastaǵan. Zardap shekkenderdiń barlyǵy mektep internatynda turǵan.
Oqýshylardy tamaqpen qamtamasyz etken Master Food kompaniiasynyń as blogyna júrgizilgen tekserý kezinde birqatar zańbuzýshylyq anyqtaldy. Atap aitqanda, azyq-túlikti saqtaý, daiyn taǵamdardyń táýliktik synamalaryn alý jáne tamaqtandyrýdy uiymdastyrý talaptary saqtalmaǵan.
Osy oqiǵadan keiin Almaty qalasy Bostandyq aýdanynyń politsiia basqarmasy qylmystyq is tirkedi.
Jappai ýlaný dereginen soń mektep ýaqytsha qashyqtan oqytý formatyna kóshirilip, internat pen ashana jumysy toqtatyldy.
22 qazanda Almaty qalasynyń Qoǵamdyq densaýlyq saqtaý basqarmasy 12 qazannan beri aýrýhanaǵa túsken 58 oqýshynyń barlyǵy emdelip, úilerine shyǵarylǵanyn habarlady.
