Belgili ánshi Ashat Tarǵyn aqtóbelik ánshi, termeshi Jánibek Bekbosynovtyń dúnieden ótýine bailanysty kóńil aityp, marqummen birge ótkizgen kúnderin eske aldy, dep habarlaidy dalanews.kz.
Óner iesi Instagram jelisindegi paraqshasynda qaraly habardy aýyr qabyldaǵanyn jetkizdi. Onyń aitýynsha, Jánibek Bekbosynovpen talai kontsertte birge óner kórsetip, túrli saparlarda joldas bolǵan.
"Jánibek Bekbosynov, jerlesim, zamandasym, talantty ánshi rabbysyna qaitty degen habar estip, kóńilim túsip otyr. Aqtóbede talai kontsertte birge júrip edik, talai saparlas bolyp edim. Alla janyńdy jánnatta shalqytsyn! Óte jaqsy jigit edi. Otbasyna qaiǵyra kóńil aitamyn", – dep jazdy Ashat Tarǵyn.
Eske salaiyq, buǵan deiin Aqtóbe óńirine tanymal ánshi, termeshi ári ustaz Jánibek Bekbosynovtyń kenetten ómirden ótkeni habarlanǵan bolatyn.
Marqum uzaq jyldar boiy Ǵaziza Jubanova atyndaǵy Aqtóbe oblystyq filarmoniiasynda solist bolyp qyzmet atqaryp, óńirdiń mádeni ómirine belsendi aralasqan.
Ol halyq ánderi men termelerdi oryndap qana qoimai, estradalyq baǵytta da óner kórsetti. Jánibek Bekbosynov respýblikalyq jáne halyqaralyq óner baiqaýlarynyń laýreaty atanǵan.
