2011 jylǵy 12 qarashada Taraz qalasynda bolǵan terroristik shabýyl Qazaqstan tarihyndaǵy eń qaiǵyly oqiǵalardyń biri retinde este qaldy. Qarýly qylmysker eki saǵatqa jýyq ýaqyt ishinde jeti adamdy óltirip, birneshe adamdy jaralaǵan. Qaza tapqandardyń qatarynda ózgelerdiń ómirin saqtap qalý úshin erlik kórsetken politsiia kapitany Ǵaziz Baitasov ta boldy, dep dalanews.kz tilshisi Stan.kz basylymyna silteme jasap habarlaidy.
Biyl 12 qarashada eldi dúr silkindirgen qaiǵyly oqiǵaǵa 15 jyl tolady. Osyǵan orai Tarazda bolǵan qarýly shabýyldyń qalai bastalyp, nemen aiaqtalǵanyn eske túsireiik.
Qandy oqiǵa neden bastaldy?
Tergeý derekterine sáikes, 2011 jylǵy 12 qarashada Maqsat Qariev esimdi azamat Taraz qalasynda aldyn ala josparlanǵan qarýly shabýyl jasaǵan.
Sol kúni ol «Qazaqtelekom» qyzmetkeriniń kiimin kiip, qala kóshelerinde júrgen.
Saǵat 11:00 shamasynda Qariev ózin baqylap júrgen Ulttyq qaýipsizdik komitetiniń eki qyzmetkerine qarýdan oq atqan. Saldarynan Sergei Kasianenko men Muhtar Haliev oqiǵa ornynda kóz jumǵan.
Osydan keiin qylmysker qarýmen qorqytyp, Mazda 626 markaly avtokólikti tartyp alǵan.
Kóp uzamai, shamamen saǵat 11:35-te ol «Make» qarý-jaraq dúkenine shabýyl jasaidy. Qarýly shabýyl kezinde dúken kúzetshisi men sol jerde bolǵan kelýshi qaza tapqan.
Qariev dúkennen birneshe qarý men oq-dárini alyp, qylmysyn jalǵastyrǵan.
Taraz kóshelerinde atys boldy
Qarý-jaraq dúkeninen shyqqan kúdikti qala ishinde qozǵalyp, taǵy bir saýda ornyna basyp kirgen. Ondaǵy adamdardy qarýmen qorqytyp, keiin basqa avtokólikti iemdengen.
Osy ýaqytta politsiiaǵa qaladaǵy qarýly shabýyldar jóninde birneshe habarlama kelip túsken.
Qylmyskerdi toqtatýǵa áreket jasaǵan politsiia serjanttary Polat Aianqulov pen Jaqsybek Baiseitov te onyń oǵynan qaza tapqan.
Budan keiin Maqsat Qariev Ulttyq qaýipsizdik komitetiniń Jambyl oblystyq departamenti ǵimaratyna granataatqyshtan oq jaýdyrǵan.
Abyroi bolǵanda, jarylys bolǵan bólmede sol sátte eshkim bolmaǵan.
Ǵaziz Baitasov ózgelerdi qutqarý úshin óz ómirin qurban etti
Qarýly shabýyldyń sońǵy sátteri politsiia kapitany Ǵaziz Baitasovtyń erligimen este qaldy.
Ol áriptesterimen birge qylmyskerdi ustaý operatsiiasyna qatysqan. Atys barysynda Maqsat Qariev jaralanǵanymen, qarsylyq kórsetýdi jalǵastyrǵan.
Kúdiktiniń qolynda granata baryn baiqaǵan Ǵaziz Baitasov ainalasyndaǵy adamdardyń ómirine qaýip tónip turǵanyn túsingen.
Tergeý materialdarynda politsiia kapitanynyń qylmyskerdi jerge qulatyp, jarylys kezinde ózgelerdi qorǵaýǵa tyrysqany aitylady.
Saǵat 12:52-de granata jarylyp, Ǵaziz Baitasov pen Maqsat Qariev qaza tapty.
Osylaisha, eki saǵatqa jýyq ýaqytqa sozylǵan qarýly shabýyl toqtatyldy.
Jeti adam qaza tapty
2011 jylǵy 12 qarashadaǵy terroristik shabýyl saldarynan jeti adamnyń ómiri qiyldy. Olardyń beseýi quqyq qorǵaý organdarynyń qyzmetkerleri bolsa, ekeýi beibit turǵyn edi.
Budan bólek, birneshe politsiia qyzmetkeri túrli jaraqat alǵan.
Oqiǵadan keiin arnaiy tergeý toby qurylyp, qylmystyń barlyq mán-jaiyn anyqtaý jumystary júrgizildi.
Tergeý barysynda shabýyl jasaǵan Maqsat Qarievtiń radikaldy dini-ekstremistik kózqarasty ustanǵany týraly aqparat jariialandy.
Batyr politseidiń esimi el jadynda qaldy
Qyzmettik boryshyn oryndaý kezinde ózgelerdi qorǵap qaza tapqan politsiia kapitany Ǵaziz Baitasovqa qaitys bolǵannan keiin elimizdiń eń joǵary dárejeli erekshelik belgisi – «Halyq qaharmany» ataǵy berildi.
Keiin Taraz qalasynda batyr politseidiń qurmetine eskertkish ornatyldy.
2026 jyly onyń esimin ulyqtaý maqsatynda «Halyq qaharmany Ǵaziz Baitasov» atty vedomstvolyq medal taǵaiyndaldy.
Medaldiń alǵashqy danasy batyrdyń jubaiy Gúljamal Tájievaǵa tabystaldy.
2026 jylǵy 12 qarashada Tarazdaǵy teraktige 15 jyl tolady. Sol kúni qyzmettik mindetin atqarý barysynda qaza tapqan azamattardyń esimi men olardyń erligi Qazaqstan tarihynda máńgi saqtalmaq.
