Qazaqstannyń dástúrli sadaq atýdan ulttyq quramasy Ońtústik Koreiada ótken álem chempionatynda top jardy. Bul týraly Májilis depýtaty, Respýblikalyq dástúrli sadaq atý federatsiiasynyń prezidenti Nartai Aralbaiuly áleýmettik jelidegi paraqshasynda málimdedi, dep habarlaidy dalanews.kz.
Álem chempionaty 30 qazan men 4 qarasha aralyǵynda Ońtústik Koreianyń Ýlsan qalasynda uiymdastyryldy. Halyqaralyq dodaǵa 38 memleketten 700-ge jýyq sportshy qatysqan. Qazaqstan atynan 45 mergen synǵa tústi.
Ulttyq quramanyń jetistigine qýanǵan Nartai Aralbaiuly áleýmettik jelide súiinshi habardy jariialady.
"Súiinshi, qazaq eli! Dástúrli sadaq atýdan Qazaqstan ulttyq quramasy álem chempiony atandy. Altyn tuǵyr qazaqtyń enshisinde. Qýan, Qazaq eli!" – dep jazdy depýtat.
Sonymen qatar ol qazaqstandyq sportshylardyń daiyndyǵy men sheberligin joǵary baǵalap, jeńimpazdarǵa alǵys bildirdi.
"Qazaqtyń surmergenderi álemde teńdessiz ekenin, jeńis tuǵyryn eshkimge bermeitinin taǵy da dáleldedi. Barlyq jeńimpazdardy, jattyqtyrýshylarymyzdy, jankúierlerdi quttyqtaimyn", – dedi Nartai Aralbaiuly.
Álem birinshiliginde mergender dástúrli sadaq atýdyń tórt túrinen baq synady. Atap aitqanda, 30 metr qashyqtyqtaǵy qazaq jambysy, 70 metrdegi túrik pýta nysanasy, 90 metrdegi vengr nysanasy jáne 145 metrdegi korei nysanasy boiynsha jarystar ótkizildi.
Jarysta Batys Qazaqstan oblysynyń sportshylary da joǵary nátijege qol jetkizdi. Rýstam Amanǵaliev pýta nysanasyndaǵy komandalyq jarysta, vengr nysanasyndaǵy komandalyq saiysta jáne jamby atýdan altyn medal jeńip aldy. Al Murat Luqpanov bir kúmis jáne bir qola medal ielendi. Ásemgúl Ǵalymjanova jamby atýdan qola júldeger atandy.
