Mádeniet jáne aqparat ministri Arman Qyryqbaev PARAQTA onlain kitaphana platformasynyń negizin qalaýshylarmen kezdesti. Kezdesý barysynda otandyq tsifrlyq jobany damytý, kitap qoryn tolyqtyrý jáne jastar arasynda kitap oqý mádenietin keńinen nasihattaý máseleleri talqylandy, dep habarlaidy dalanews.kz.
Kezdesýge PARAQTA platformasynyń avtorlary men negizin qalaýshylary qatysyp, jobanyń jumysymen jáne qol jetkizgen nátijelerimen tanystyrdy. Ministr olardyń áleýmettik jelilerdegi jazbalaryna nazar aýdaryp, bastamanyń damý perspektivalaryn talqylaýǵa shaqyrǵan.
Kezdesý barysynda Arman Qyryqbaev Memleket basshysy Qasym-Jomart Toqaevtyń kitap oqý mádenietin qalyptastyrý jáne zerdeli ult tárbieleý jónindegi bastamalary aiasynda júzege asyrylyp jatqan jumystarǵa toqtaldy.
Atap aitqanda, ministrlik úilestirip otyrǵan «Kitap oqityn ult» jalpyulttyq marafonynyń nátijeleri tanystyryldy. Búginde reading-nation.kz platformasyna 1,4 millionnan astam adam tirkelip, qatysýshylar 842 myńnan astam kitap oqyǵan. Sonymen qatar oqyrmandar kitap týraly pikirlerimen bólisip, ózgelerdi oqýǵa yntalandyratyn 50 myńnan astam beinejazba jariialaǵan.
Kezdesýde PARAQTA platformasynyń múmkindikteri de tanystyryldy. Joba oqyrmandardyń kitap oqýǵa degen qyzyǵýshylyǵyn arttyrýǵa, oqý barysyn baqylaýǵa jáne bastaǵan kitabyn sońyna deiin oqyp shyǵýǵa yntalandyrýǵa baǵyttalǵan. Platformanyń ereksheligi – munda elektrondy kitaptarmen qatar, qaǵaz kitap oqý da esepke alynady.
Joba ókilderiniń málimetinshe, qazirgi ýaqytta PARAQTA platformasynda 15 186 oqyrman tirkelgen. Olar jalpy 1,2 million bet oqyp, 10 738 kitapty aiaqtaǵan. Sonymen qatar platforma aiasynda 180 kitap klýby jumys isteidi.
Jobaǵa biyl bir jyl eki ai tolǵan. Alty ai buryn onyń veb-saity iske qosylsa, jýyrda mobildi qosymshasy App Store dúkeninde qoljetimdi boldy.
Kezdesý barysynda platformany odan ári damytýǵa qajetti máseleler de kóterildi. Sonyń ishinde kitap qoryn tolyqtyrý negizgi basymdyqtardyń biri retinde ataldy. Qazirgi tańda platformada avtorlyq quqyq merzimi aiaqtalyp, qoǵamdyq igilikke ótken 150-ge jýyq kitap tegin usynylǵan. Degenmen oqyrmandar tarapynan qosymshada tikelei oqýǵa bolatyn kitaptar sanyn kóbeitý jóninde usynystar jii túsedi.
Osyǵan bailanysty ministrlik ókilderi kitap qoryn zańnama talaptaryna sáikes tolyqtyrýǵa qoldaý kórsetýge daiyn ekenin jetkizdi. Sondai-aq PARAQTA jobasynyń aiasynda oflain kezdesýler men birlesken is-sharalar ótkizýge arnalǵan alań qarastyrý máselesi talqylandy.
Kezdesý qorytyndysy boiynsha taraptar kitap oqý mádenietin damytýǵa baǵyttalǵan bastamalardy qoldaý jáne ózara yntymaqtastyq múmkindikterin qarastyrý jóninde pikir almasty.
Aita keteiik, PARAQTA – qazaqstandyq oqyrmandarǵa arnalǵan tsifrlyq platforma. Onyń negizgi maqsaty – kitap oqýdy kúndelikti daǵdyǵa ainaldyrý, oqyrmandar qaýymdastyǵyn qalyptastyrý jáne qoǵamdaǵy oqý mádenietiniń damýyna úles qosý.
