Qazaqstanda baiqalmaityn ekonomikanyń jalpy ishki ónimdegi úlesi sońǵy on jylda aitarlyqtai tómendegen. 2025 jyldyń qorytyndysy boiynsha bul kórsetkish 15,7 paiyzdy qurady. Al 2015 jyly 27,5 paiyz bolǵan, dep habarlaidy dalanews.kz.
Sońǵy bes jylda kóleńkeli ekonomikanyń úlesi ásirese saýda jáne logistika salalarynda azaiǵan. Atap aitqanda, saýdadaǵy kórsetkish 5,6 paiyzdan 3,1 paiyzǵa deiin tómendese, logistika salasynda 2,9 paiyzdan 1,1 paiyzǵa qysqarǵan.
Aýyl sharýashylyǵynda baiqalmaityn ekonomikanyń úlesi 2,6 paiyzdan 1,8 paiyzǵa, óńdeý ónerkásibinde 1,3 paiyzdan 1 paiyzǵa deiin azaiǵan.
Óńirler arasynda kóleńkeli ekonomikanyń eń joǵary úlesi Túrkistan oblysynda tirkelgen. Munda kórsetkish 27,8 paiyzǵa jetken. Odan keiin Jetisý oblysy (26,1 paiyz) men Jambyl oblysy (25,7 paiyz) tur.
Al eń tómen kórsetkish Atyraý oblysynda – 4,5 paiyz, Ulytaý oblysynda 5 paiyz bolǵan.
Mamandar kóleńkeli ekonomikanyń qysqarýyn ekonomikalyq protsesterdiń tsifrlanýymen bailanystyrady. Atap aitqanda, onlain-kassalardyń engizilýi, taýarlardy tańbalaý, elektrondy saýdanyń damýy jáne júk tasymalyn tsifrlyq júieler arqyly baqylaý saýda operatsiialary men taýar ainalymynyń ashyqtyǵyn arttyrýǵa múmkindik bergen.
Kóleńkeli ekonomikany odan ári qysqartý jumystary 2026–2028 jyldarǵa arnalǵan keshendi jospar aiasynda jalǵasady. Belgilengen mejege sáikes, 2026 jyldyń sońyna qarai bul kórsetkishti 14,5 paiyzǵa, al 2028 jylǵa qarai 13,8 paiyzǵa deiin tómendetý kózdelgen.
