Qazaqstanda qańtar-qazan ailaryndaǵy ishki saýda ósimi byltyrǵy 9 paiyzben salystyrǵanda 6,2 paiyzǵa deiin baiaýlady. Kóterme saýdadaǵy ósim 9,7 paiyzdan 6,9 paiyzǵa, bólshek saýdada 7,4 paiyzdan 4,7 paiyzǵa tómendedi. Bólshek saýda ósim baiaýlaýy suranys tómendegenin kórsetse, kóterme saýdadaǵy ózgeris korporativtik sektordaǵy taýar ainalymy ósimi báseńdegenin ańǵartady, dep habarlaidy dalanews.kz.
Kóterme saýda boiynsha
2026 jylǵy qańtar-qazanda kóterme saýda kólemi 47 007,6 milliard teńgege jetti. Bul 2025 jylǵy osy kezeńdegi kórsetkishtiń 106,9 paiyzyna teń. Kóterme saýda ainalymynyń basym bóligi - azyq-túlikke jatpaityn taýarlar men óndiristik-tehnikalyq maqsattaǵy ónimder. Olardyń úlesi - 80,2 paiyz.
Bólshek saýda boiynsha
Bólshek saýda kólemi 23 034,5 milliard teńge boldy. Bul 2025 jylǵy kórsetkishten 4,7 paiyzǵa kóp. Saýda kásiporyndarynyń taýarlardy bólshek saýdada ótkizý kólemi 2,5 paiyzǵa, al bazarlarda saýda jasaityndardy qosa alǵanda, jeke kásipkerlerdiń saýda kólemi 2025 jylǵy qańtar-qazanmen salystyrǵanda 8,8 paiyzǵa artty.
Bólshek saýdanyń jalpy kóleminde azyq-túlik taýarlarynyń úlesi 35,7 paiyz, al azyq-túlikke jatpaityn taýarlardyń úlesi 64,3 paiyz boldy. 2025 jylǵy qańtar-qazanmen salystyrǵanda azyq-túlik taýarlaryn satý kólemi 11,9 paiyzǵa, al azyq-túlikke jatpaityn taýarlardy satý kólemi 0,9 paiyzǵa ósti.
