قازاقستاندا قاڭتار-قازان ايلارىنداعى ٸشكٸ ساۋدا ٶسٸمٸ بىلتىرعى 9 پايىزبەن سالىستىرعاندا 6,2 پايىزعا دەيٸن باياۋلادى. كٶتەرمە ساۋداداعى ٶسٸم 9,7 پايىزدان 6,9 پايىزعا, بٶلشەك ساۋدادا 7,4 پايىزدان 4,7 پايىزعا تٶمەندەدٸ. بٶلشەك ساۋدا ٶسٸم باياۋلاۋى سۇرانىس تٶمەندەگەنٸن كٶرسەتسە, كٶتەرمە ساۋداداعى ٶزگەرٸس كورپوراتيۆتٸك سەكتورداعى تاۋار اينالىمى ٶسٸمٸ بەسەڭدەگەنٸن اڭعارتادى, دەپ حابارلايدى dalanews.kz.
كٶتەرمە ساۋدا بويىنشا
2026 جىلعى قاڭتار-قازاندا كٶتەرمە ساۋدا كٶلەمٸ 47 007,6 ميلليارد تەڭگەگە جەتتٸ. بۇل 2025 جىلعى وسى كەزەڭدەگٸ كٶرسەتكٸشتٸڭ 106,9 پايىزىنا تەڭ. كٶتەرمە ساۋدا اينالىمىنىڭ باسىم بٶلٸگٸ - ازىق-تٷلٸككە جاتپايتىن تاۋارلار مەن ٶندٸرٸستٸك-تەحنيكالىق ماقساتتاعى ٶنٸمدەر. ولاردىڭ ٷلەسٸ - 80,2 پايىز.
بٶلشەك ساۋدا بويىنشا
بٶلشەك ساۋدا كٶلەمٸ 23 034,5 ميلليارد تەڭگە بولدى. بۇل 2025 جىلعى كٶرسەتكٸشتەن 4,7 پايىزعا كٶپ. ساۋدا كەسٸپورىندارىنىڭ تاۋارلاردى بٶلشەك ساۋدادا ٶتكٸزۋ كٶلەمٸ 2,5 پايىزعا, ال بازارلاردا ساۋدا جاسايتىنداردى قوسا العاندا, جەكە كەسٸپكەرلەردٸڭ ساۋدا كٶلەمٸ 2025 جىلعى قاڭتار-قازانمەن سالىستىرعاندا 8,8 پايىزعا ارتتى.
بٶلشەك ساۋدانىڭ جالپى كٶلەمٸندە ازىق-تٷلٸك تاۋارلارىنىڭ ٷلەسٸ 35,7 پايىز, ال ازىق-تٷلٸككە جاتپايتىن تاۋارلاردىڭ ٷلەسٸ 64,3 پايىز بولدى. 2025 جىلعى قاڭتار-قازانمەن سالىستىرعاندا ازىق-تٷلٸك تاۋارلارىن ساتۋ كٶلەمٸ 11,9 پايىزعا, ال ازىق-تٷلٸككە جاتپايتىن تاۋارلاردى ساتۋ كٶلەمٸ 0,9 پايىزعا ٶستٸ.
