Qazaqstanda jeke kásipker retinde resmi tirkelip, óz isin júrgizetin azamattar kóbeiip keledi. Ulttyq statistika biýrosynyń dereginshe, keiingi alty jylda jeke kásipkerler sany 1,53 millionnan 1,73 million adamǵa deiin ósken. Bul 2019 jylmen salystyrǵanda shamamen 13 paiyz artyq, dep habarlaidy dalanews.kz.
Osy aralyqta jeke kásipker mártebesin almai, óz betinshe eńbek etetin táýelsiz jumyskerler sany kerisinshe azaiǵan. Olardyń qatary 555,8 myńnan 393,3 myń adamǵa deiin, iaǵni úshten birge jýyq qysqarǵan.
2025 jyly eldegi ózin-ózi jumyspen qamtyǵandar sany 2,1 million adamdy qurady. Bul - jumyspen qamtylǵan halyqtyń 23,1 paiyzy. Atalǵan toptyń qurylymy da aitarlyqtai ózgergen. Qazir jeke kásipkerler ózin-ózi jumyspen qamtyǵandardyń shamamen 80 paiyzyn quraidy. Al 2019 jyly eleýli úleske ie bolǵan táýelsiz jumyskerlerdiń sany jyl ótken saiyn kemip keledi.
Óndiristik kooperativ músheleriniń úlesi de barynsha azaiǵan. Qazirgi tańda olardyń sany el boiynsha 3 myńnan 20 myń adamǵa deiingi aralyqta. Jeke praktikamen ainalysatyn azamattar qatary da kóp emes, shamamen 16-26 myń adam.
Óńirler arasynda Túrkistan oblysy kósh bastap tur. Munda 314,2 myń jeke kásipker tirkelgen. Odan keiin Almaty oblysy - 165,2 myń, Shymkent - 147 myń, Almaty qalasy - 132 myń jáne Jambyl oblysy 129,4 myń kásipkermen alǵashqy bestikke endi.
Ulytaý oblysynda 4,8 myń, al Abai oblysynda 97,3 myń jeke kásipker bar. Jalpy kórsetkishter eldiń ońtústigi men soltústik-shyǵys óńirleri arasyndaǵy kásipkerlik belsendilikte áli de eleýli aiyrmashylyq bar ekenin ańǵartady.
