Aqtóbe qalasyndaǵy turǵyn úidiń birinshi qabatynda ornalasqan dámhanada gaz-aýa qospasy jarylyp, eki adam zardap shekti. Oqiǵaǵa bailanysty Qylmystyq kodekstiń 292-babynyń 2-bóligi boiynsha qylmystyq is qozǵaldy, dep habarlaidy dalanews.kz.
Aqtóbe qalalyq politsiia departamentiniń málimetinshe, atalǵan derek boiynsha qylmystyq is tirkelgen.
Oqiǵa saldarynan zardap shekken eki adam №1 qalalyq kópbeiindi aýrýhanaǵa jetkizildi.
Aqtóbe oblystyq densaýlyq saqtaý basqarmasynyń habarlaýynsha, jedel járdem qyzmetine shaqyrtý 13 qarasha kúni saǵat 10:28-de túsken. Bir minýt ishinde oqiǵa ornyna eki jedel járdem brigadasy jetken.
«Zardap shekkenderdiń jaǵdaiy turaqty, ómirine qaýip tónip turǵan joq. Olarǵa qajetti meditsinalyq kómek kórsetilip jatyr. 19 jastaǵy jigit jansaqtaý bóliminde, al 36 jastaǵy áiel politravma bólimine jatqyzyldy», - dep habarlady basqarma.
Eske salaiyq, 13 qarashada Táýelsizdik dańǵyly, 14/1 mekenjaiyndaǵy bes qabatty turǵyn úidiń birinshi qabatynda ornalasqan dámhanada gaz-aýa qospasy jarylǵan. Saldarynan ǵimarattyń japsarlas qurylysy qulap, órt shyqqan. Sondai-aq turǵyn úidiń terezeleri zaqymdanǵan.
Órt saǵat 10:53-te tolyq sóndirildi. Oqiǵa saldarynan adam ólimi tirkelgen joq.
