اقتٶبە قالاسىنداعى تۇرعىن ٷيدٸڭ بٸرٸنشٸ قاباتىندا ورنالاسقان دەمحانادا گاز-اۋا قوسپاسى جارىلىپ, ەكٸ ادام زارداپ شەكتٸ. وقيعاعا بايلانىستى قىلمىستىق كودەكستٸڭ 292-بابىنىڭ 2-بٶلٸگٸ بويىنشا قىلمىستىق ٸس قوزعالدى, دەپ حابارلايدى dalanews.kz.
اقتٶبە قالالىق پوليتسييا دەپارتامەنتٸنٸڭ مەلٸمەتٸنشە, اتالعان دەرەك بويىنشا قىلمىستىق ٸس تٸركەلگەن.
وقيعا سالدارىنان زارداپ شەككەن ەكٸ ادام №1 قالالىق كٶپبەيٸندٸ اۋرۋحاناعا جەتكٸزٸلدٸ.
اقتٶبە وبلىستىق دەنساۋلىق ساقتاۋ باسقارماسىنىڭ حابارلاۋىنشا, جەدەل جەردەم قىزمەتٸنە شاقىرتۋ 13 قاراشا كٷنٸ ساعات 10:28-دە تٷسكەن. بٸر مينۋت ٸشٸندە وقيعا ورنىنا ەكٸ جەدەل جەردەم بريگاداسى جەتكەن.
«زارداپ شەككەندەردٸڭ جاعدايى تۇراقتى, ٶمٸرٸنە قاۋٸپ تٶنٸپ تۇرعان جوق. ولارعا قاجەتتٸ مەديتسينالىق كٶمەك كٶرسەتٸلٸپ جاتىر. 19 جاستاعى جٸگٸت جانساقتاۋ بٶلٸمٸندە, ال 36 جاستاعى ەيەل پوليتراۆما بٶلٸمٸنە جاتقىزىلدى», - دەپ حابارلادى باسقارما.
ەسكە سالايىق, 13 قاراشادا تەۋەلسٸزدٸك داڭعىلى, 14/1 مەكەنجايىنداعى بەس قاباتتى تۇرعىن ٷيدٸڭ بٸرٸنشٸ قاباتىندا ورنالاسقان دەمحانادا گاز-اۋا قوسپاسى جارىلعان. سالدارىنان عيماراتتىڭ جاپسارلاس قۇرىلىسى قۇلاپ, ٶرت شىققان. سونداي-اق تۇرعىن ٷيدٸڭ تەرەزەلەرٸ زاقىمدانعان.
ٶرت ساعات 10:53-تە تولىق سٶندٸرٸلدٸ. وقيعا سالدارىنان ادام ٶلٸمٸ تٸركەلگەن جوق.
