Memleket basshysy Qasym-Jomart Toqaev Qaýipsizdik Keńesiniń shuǵyl otyrysynda málimdeme jasady, dep habarlaidy dalanews.kz.
Prezidenttiń sózinshe, tek keiingi úsh jyl ishinde, iaǵni 2023 jáne 2025 jyldar aralyǵynda sybailas jemqorlyq boiynsha 3 168 quqyqbuzýshylyq anyqtalǵan, sonyń ishinde 2 165-in memlekettik qyzmetshiler jasaǵan, al qalǵanyn basqa da tulǵalar, atap aitqanda, kvazimemlekettik sektor qyzmetshileri jasaǵan. Jalpy somasy 248 milliard teńgeden asady.
"Biyl on ai ishinde sybailas jemqorlyqqa qatysty 751 quqyqbuzýshylyq jasalǵan, sonyń 546-syn memlekettik qyzmetshiler, al 205-in ózge de tulǵalar jasaǵan, sonyń ishinde kvazimemlekettik sektor qyzmetshileri de bar. Osy statistikadan kórip otyrǵanymyzdai, elimizdegi sybailas jemqorlyq ahýaly kúrdeli bolyp tur. Biraq biz eshnárseni de jasyrmaimyz, basyn qumǵa tyqqan straýstyń keipine túspeimiz. Biz osy saladaǵy máseleniń bárin ashyq aitamyz, jemqorlyqty joiý úshin qabyldanǵan jáne qabyldanatyn sharalar týraly da eshnárseni jasyrmai, barlyǵyn halyqqa ashyq kórsetip otyramyz", - dedi Toqaev.
Sol sebepti túrli deńgeidegi basshylardyń jymqyrýǵa qatysty quqyqbuzýshylyqtaryn Ulttyq qaýipsizdik komitetiniń Sybailas jemqorlyqqa qarsy is-qimyl jónindegi qyzmeti Bas prokýratýramen birge jedel jáne jiti tekseredi.
