Birikken Arab Ámirlikteriniń iri qarjy tobyna kiretin Abu Dhabi Commercial Bank (Kazakhstan) Qazaqstanda ámbebap banktik litsenziia aldy. Endi bank dástúrli qarjy qyzmetterimen qatar, islamdyq qarjylandyrý ónimderin de usyna alady. Bul - elimizde dástúrli jáne islamdyq bankingti bir uiym aiasynda júzege asyrýǵa ruqsat alǵan alǵashqy bank, dep habarlaidy dalanews.kz.
Banktik litsenziiany Qazaqstannyń Qarjy naryǵyn retteý jáne damytý agenttiginiń tóraǵasy Mádina Ábilqasymova XIV Qazaqstan qarjygerleriniń kongresi aiasynda saltanatty túrde tabystady.
Agenttik málimetinshe, Abu Dhabi Commercial Bank (Kazakhstan) ámbebap banktik operatsiialardy júzege asyrýǵa, sondai-aq «islamdyq tereze» tetigi arqyly islamdyq qarjylandyrý qyzmetterin kórsetýge múmkindik aldy.
«Abu Dhabi Commercial Bank (Kazakhstan) dástúrli jáne islamdyq banktik qyzmetti bir banktiń aiasynda, iaǵni «islamdyq tereze» tetigi arqyly usynýǵa ruqsat alǵan Qazaqstandaǵy alǵashqy bank boldy», - dep habarlady qarjy retteýshisi.
Jańa tetik klientterge bir bankten dástúrli qarjy ónimderimen qatar, islam qaǵidattaryna sáikes keletin qarjylandyrý quraldaryn tańdaýǵa múmkindik beredi. Bul úshin jeke islam bankin qurýdyń qajeti bolmaidy.
Bank aktivteri $242 mlrd-tan asady
Qarjy naryǵyn retteý jáne damytý agenttiginiń basshysy Mádina Ábilqasymovanyń aitýynsha, jańa litsenziia Qazaqstan men BAÁ arasyndaǵy investitsiialyq yntymaqtastyqty tereńdetýge baǵyttalǵan. Bul bastama Memleket basshysynyń elge senimdi sheteldik bankterdi tartý, bank sektoryndaǵy básekelestikti kúsheitý jáne naqty sektordy qarjylandyrýdy keńeitý jónindegi tapsyrmasyna sáikes júzege asyrylyp otyr.
2025 jyldyń qorytyndysy boiynsha Birikken Arab Ámirlikterinen Qazaqstanǵa tartylǵan tikelei investitsiia kólemi 1,64 mlrd dollardy quraǵan. Bul aldyńǵy jylmen salystyrǵanda eki eseden astam kóp.
ADCB bank toby BAÁ-degi aktivteriniń kólemi boiynsha úshinshi orynda tur. 2026 jylǵy 30 qyrkúiektegi jaǵdai boiynsha toptyń aktivteri 242,3 mlrd dollarǵa, menshikti kapitaly 24,8 mlrd dollarǵa jetken. Al biylǵy toǵyz aidaǵy taza paidasy 2,8 mlrd dollardy quraǵan.
Banktiń nesie portfeli 127 mlrd dollardan asady. Qarjy toby korporativtik jáne investitsiialyq banking, saýda jáne jobalyq qarjylandyrý, halyqaralyq esep aiyrysý men qarjylyq táýekelderdi basqarý baǵyttarynda tájiribege ie.
Qazaqstanda bank qalai quryldy?
Abu Dhabi Commercial Bank PJSC-ge Qazaqstanda enshiles bank qurýǵa 2026 jylǵy naýryzda ruqsat berilgen. Jańa qarjy uiymy 20 sáýirde zańdy tulǵa retinde memlekettik tirkeýden ótti. Al 13 qarashada ámbebap banktik jáne islamdyq banktik operatsiialardy júzege asyrýǵa arnalǵan litsenziialar tabystaldy.
Buǵan deiin Qazaqstanda osy qarjy tobynyń qatysýymen «Islam Banki ADCB» jumys istegen. Ol buryn Al Hilal ataýymen belgili bolǵan. Qarasha aiynyń basynda islam banki aktivteri men mindettemelerin Qazaqstandaǵy jańa enshiles qurylymǵa berý jumysyna daiyndalyp jatqany habarlanǵan edi.
Aita keteiik, dástúrli jáne islamdyq banktik qyzmetti bir uiym aiasynda usyný múmkindigi 2026 jylǵy 16 qańtarda qabyldanǵan «Bankter jáne bank qyzmeti týraly» jańa zańda qarastyrylǵan. Qarjy retteýshisiniń pikirinshe, jańa banktiń naryqqa shyǵýy qarjy qyzmetteriniń túrin kóbeitip, biznes pen halyq úshin balama qarjylandyrý múmkindikterin keńeitedi.
