Qazaqstanda úshinshi atom elektr stantsiiasyn salýǵa arnalǵan yqtimal alańdardyń qataryna eldiń soltústik óńiri de qosyldy. Atap aitqanda, Qostanai oblysyndaǵy Tobyl ózeni mańy qarastyrylyp jatyr. Buǵan deiin Shyǵys Qazaqstandaǵy Kýrchatov qalasy men Kaspii teńiziniń jaǵalaýy yqtimal oryndar retinde atalǵan, dep habarlaidy dalanews.kz.
Bul týraly Atom energiiasy agenttiginiń tóraǵasy Almasadam Sátqaliev «Dúniejúzilik atom kúnderi - 2026» forýmynda málimdedi. Onyń aitýynsha, Qazaqstanda úshinshi atom elektr stantsiiasyn ornalastyrýǵa bolatyn birneshe aýmaq zerttelip jatyr. Alaida ázirge naqty qurylys jospary nemese túpkilikti sheshim joq.
«Biz Shyǵys Qazaqstandaǵy Kýrchatov alańyn zerttep jatyrmyz. Batys Qazaqstandaǵy Kaspii teńiziniń jaǵalaýyndaǵy aýmaq ta kóptegen faktor boiynsha qolaily. Sonymen qatar júielik operator - KEGOC kompaniiasynyń usynysy boiynsha soltústik Qazaqstandaǵy Tobyl ózeni mańyndaǵy alańdy da qarastyryp jatyrmyz. Bul jerde salqyndatýǵa qajetti sý kóleminiń bolýy eskerilip otyr», - dedi Almasadam Sátqaliev.
Agenttik basshysynyń sózinshe, úshinshi stantsiianyń ornyn tańdaý kezinde elektr energiiasyn tutynýdyń boljamdy ósimi, sý resýrstary jáne atom tehnologiialaryn keshendi paidalaný múmkindikteri nazarǵa alynady.
Sondai-aq Qazaqstanda qýaty ortasha reaktorlardy ornalastyrý múmkindigi zerttelip jatyr. Mundai stantsiialar elektr energiiasyn óndirýmen qatar, tutynýshylardy jylýmen qamtamasyz etýge, al keibir jaǵdaida sýdy tushylandyrýǵa múmkindik beredi.
Qazaqstannyń atom salasyn 2050 jylǵa deiin damytý strategiiasynda elde keminde úsh atom elektr stantsiiasyn salý kózdelgen. Alǵashqy eki stantsiiany ornalastyrý úshin Almaty oblysynyń Jambyl aýdany tańdalǵan. Bul aýmaqtyń qolailylyǵy geologiialyq, gidrologiialyq jáne basqa da zertteýler nátijesinde anyqtalǵan.
Úshinshi AES úshin qarastyrylyp jatqan Kýrchatov, Kaspii jaǵalaýy jáne Tobyl ózeni mańyndaǵy aýmaqtar aldaǵy kezeńderde qosymsha zertteledi. Qurylys ornyna qatysty túpkilikti sheshim ázirge qabyldanǵan joq.
