Astanada LRT jelisiniń ekinshi kezeńin salýǵa bailanysty Syǵanaq, Aitmatov kósheleri men Turan dańǵylyndaǵy kólik qozǵalysyna qoiylǵan ýaqytsha shekteýler 2027 jyldyń sońyna deiin saqtalady. Bul týraly elorda ákimi Jeńis Qasymbek málimdedi, dep habarlaidy dalanews.kz.
Ákimniń aitýynsha, qazir turǵyndardan Tarlan Astana jobasynyń ekinshi kezeńine, sonyń ishinde atalǵan kóshelerdegi qozǵalys shekteýlerine qatysty saýaldar túsip jatyr.
«Aitmatov kóshesi men Turan dańǵyly boiynda jeli qurylysyn belsendi bastaimyz. Qurylys kezeńinde, iaǵni biylǵy jyldyń sońyna deiin jáne kelesi jyly Syǵanaq, Aitmatov kósheleri men Turan dańǵylynda júrgizýshiler úshin ýaqytsha qolaisyzdyqtar saqtalady. Degenmen kólik qozǵalysyn qamtamasyz etý úshin bar kúshimizdi salamyz», - dedi Jeńis Qasymbek.
Onyń sózinshe, qurylys aiaqtalǵannan keiin Tarlan Astana kólik qozǵalysyn edáýir jeńildetip, kóshelerdiń ótkizý qabiletin arttyrýǵa jáne keptelis máselesin sheshýge múmkindik beredi.
Qazirgi ýaqytta LRT jelisiniń Qosshy baǵytyna qarai sozylatyn ekinshi kezeńindegi jumystar jalǵasyp jatyr. Bul ýchaskedegi qurylysty aiaqtap, poiyz qozǵalysyn 2027 jyldyń sońyna deiin iske qosý josparlanǵan. Jobaǵa jaýapty kompaniia qurylys jumystaryn sapaly ári múmkindiginshe qysqa merzimde aiaqtaýǵa ýáde berip otyr.
Qasymbek ekinshi kezeń aiasynda salynyp jatqan №201, №202 jáne №204 stantsiialardyń qurylys barysymen de tanysqan.
Ákimniń málimetinshe, Syǵanaq kóshesiniń boiynda ornalasqan №201 stantsiiada eki deńgeili aýysyp miný torabynyń qurylysy bastalǵan. Bul jerde №2 jáne №3 jeliler qiylysady. Sonyń arqasynda jolaýshylar kóshege shyqpai-aq bir baǵyttan ekinshisine jyldam ári yńǵaily aýysa alady.
Joba júzege asqannan keiin elordanyń kólik múmkindigi keńeiip, turǵyndardyń qatynaýy jeńildeidi. Sonymen qatar qalada zamanaýi kólik infraqurylymy qalyptasady.
Ákimniń dereginshe, qazirgi ýaqytta Tarlan Astana kóligimen jasalǵan saparlardyń jalpy sany 13,8 millionǵa jetken.
