Qazaqstandaǵy shaǵyn jáne orta kásip ieleriniń bir bóligi 2027 jyldyń kókteminde jumysyn toqtatýy múmkin. Salyq konsýltanty ári kásipker Dmitrii Kazantsev muny jańa Salyq kodeksinen keiin bizneske túsetin salmaqtyń artýymen bailanystyrady, dep habarlaidy dalanews.kz ulysmedia.kz-ke silteme jasap.
Sarapshynyń aitýynsha, jalpyǵa birdei belgilengen salyq rejimindegi kásipkerler 2026 jyldyń qorytyndysy boiynsha salyqty 2027 jyldyń naýryz-sáýir ailarynda tóleidi. Sol kezde birqatar kompaniianyń qarjylai jaǵdaiy qiyndap, qyzmetin jalǵastyrýǵa múmkindigi qalmaýy múmkin.
"Qazir biznestiń, ásirese shaǵyn kásip ieleriniń jaǵdaiy kúrdeli. Jumysyn jalǵastyryp otyrǵandardyń ózi tabysynyń edáýir bóligin joǵaltty", – deidi Dmitrii Kazantsev.
Onyń sózinshe, jańa Salyq kodeksindegi ózgerister kásipkerlerdiń shyǵynyn arttyryp, taýar men qyzmet baǵasyna tikelei áser etken. Buǵan deiin jeńildetilgen rejimmen 3 paiyz salyq tólegen keibir kásip ieleri endi basqa rejimge aýysýǵa májbúr.
"Buryn kásipker 3 paiyz tóleitin. Qazir jeke kásipker úshin salyq 10 paiyzǵa, al jaýapkershiligi shekteýli seriktestik úshin 20 paiyzǵa deiin jetedi. Ainalymy 40 mln teńgeden assa, oǵan 16 paiyzdyq qosylǵan qun salyǵy qosylady. Nátijesinde salyq júktemesi 26–36 paiyzǵa deiin ósýi múmkin", – dep túsindirdi ol.
Kazantsevtiń negizgi kásibi konsalting pen jarnama salasyna bailanysty. Onyń aitýynsha, salyq kólemi artqanymen, qyzmet baǵasyn birden kóterý múmkin bolmaǵan.
"Baǵany 26 paiyzǵa ósire almadym. Óitkeni menimen uzaq jyldan beri jumys isteitin klientter bar. Olarǵa bir kúnde jańa talap qoia almaimyn. Sonyń saldarynan tabysym azaidy. Satylymnan paiyz alatyn menedjerlerimniń de kirisi tómendedi. Olar burynǵydai taýar satyp ala almaidy. Mundai jaǵdai qazir biznestiń barlyq salasynda baiqalady", – dedi sarapshy.
Jańa talaptardyń biri jalpyǵa birdei belgilengen rejimdegi kompaniialardyń jeńildetilgen deklaratsiiamen jumys isteitin kásipkerlerden taýar nemese qyzmet satyp alýǵa jumsaǵan qarajatyn salyqtyq shegerimge jatqyzýyna shekteý qoidy. Sonyń saldarynan iri kompaniialar jeńildetilgen rejimdegi shaǵyn kásip ielerimen áriptestikti azaita bastaǵan.
Sarapshy jyl basynan beri jabylǵan 350 myńnan astam kásiptiń barlyǵyn «jumys istemegen kompaniialar» dep baǵalaýmen kelispeidi.
"Men tek sarapshy emes, kásipkermin. Biyl rentabeldiligin joǵaltqan úsh biznesimdi jabýǵa týra keldi. Mundai jaǵdaiǵa tap bolǵandar az emes. Másele kásiporyndardyń jabylýynda ǵana emes, jumys istep turǵan biznestiń de tabys ákelmeýinde", – dedi Dmitrii Kazantsev.
