Jetisý oblysynda tórtem dúniege kelgen otbasyǵa úsh bólmeli páter syiǵa tartyldy. Sábilerin Almaty qalasyndaǵy Ulttyq akýsherlik, ginekologiia jáne perinatologiia ǵylymi ortalyǵynda ómirge ákelip, týǵan úiine oralǵan jas anany búgin jerlesteri saltanatpen qarsy alyp, jańa páterdiń kiltin tapsyrdy, dep habarlaidy dalanews.kz.
Óńir basshysynyń atynan ata-anasy men sábilerdi oblys ákiminiń orynbasary Marlen Kólbaev quttyqtady.
– Saryózek aýylynda otbasyna jańa kópqabatty turǵyn úidiń ekinshi qabatynan úsh bólmeli páter berip otyrmyz. Páterde jaily turmysqa qajetti barlyq jaǵdai jasalǵan. Almira Almaty qalasynda bolǵan kezde oblys ákimi kún saiyn balalardyń jaǵdaiyn surap-bilip otyrdy. Biz Ulttyq akýsherlik, ginekologiia jáne perinatologiia ǵylymi ortalyǵynyń mamandarymen turaqty bailanysta bolyp, ana men balalardyń jaǵdaiyn birge baqyladyq. Tórt sábidi birdei kútip-baǵý ońai emes. Sondyqtan Almiraǵa balalardyń kútimine kómektesetin arnaiy kómekshi beriledi. Jalpy, búldirshinderdiń deni saý bolyp ósip, aman-esen jetilýi úshin óz tarapymyzdan barlyq qajetti kómekti kórsetemiz, – dedi M. Kólbaev otbasyǵa jańa páterdiń kiltin tabystaý kezinde.
Kerbulaq aýdanynyń Taldybulaq aýylynda turatyn otbasynda tórtemnen bólek úsh balasy bar. Endi tórt uldyń dúniege kelgen otbasy birden kóp balaly atandy.
Tórtemniń anasy Almira Bekeeva 31 jasta. Ol Y. Altynsarin atyndaǵy orta mektepte pedagog bolyp jumys isteidi. Al jubaiy Oljas Bekeev - júk kóliginiń júrgizýshisi. Ásirese, otbasyna birden tórt uldyń qosylǵanyna ákesi erekshe qýanyshty.
Jas ananyń qursaǵynda birden tórt sábidiń bitkenin anyqtalǵan boida patsient Almatydaǵy Ulttyq akýsherlik, ginekologiia jáne perinatologiia ǵylymi ortalyǵynda mamandardyń baqylaýyna alyndy. 24 qyrkúiekte dárigerler operatsiialyq jolmen bosandyryp, Arlan, Arsylan, Álihan, Ámirhan esimdi tórt ul dúnie esigin ashty.
– Eń alǵash qursaǵymda tórtem bar ekenin ÝZI-den bilgende, qatty qýandyq. Árine, olardy kóterip júrý ońai bolǵan joq. Balalar úshin ishtei qorqynysh ta, ýaiym da boldy. Kesar tiligi arqyly otyz apta alty kún degende uldarymyz dúniege keldi. Otany ǵylymi ortalyqtyń direktory jasady. Balalar shala týǵandyqtan, alǵashqy sátten bastap dárigerlerdiń qaraýynda boldy. Qazir jaqsy salmaq jinap, barlyq qiyndyqtardy artqa tastap, úige oraldyq, – deidi jas ana.
Tórtemniń atasy da qýanyshyn jasyrǵan joq:
- Bul – bizge qudaidyń bergen úlken syiy. Tórtemniń ómirge kelgenine bizdiń otbasymyz ǵana emes, búkil Jetisý qýanyp jatyr. Ózim atasy retinde keremet sezimde turmyn. Almatydan kelinim men nemerelerimdi qurmetpen shyǵaryp salyp, aýylymyz da saltanatpen qarsy alyp jatyr. Bizben birge qýanǵan barsha jurtshylyqqa rahmet aitamyn, - dedi Qairat Bekeev.
