Qostanaida ata-anasynyń qamqorlyǵynsyz qalǵan azamat mektep-internattyń saldarynan turǵyn úi kezegine ýaqytynda tirkelmegenin aityp, «Otbasy bankpen» sottasty. Taraptar mediatsiialyq kelisimge kelip, azamattyń kezekke qoiylǵan kúni 2020 jyldan 2009 jylǵa aýystyryldy, dep habarlaidy dalanews.kz.
Qostanai oblysynyń mamandandyrylǵan aýdanaralyq ákimshilik sotynyń málimetinshe, talap qoiýshy 2007 jyldan bastap ata-anasynyń qamqorlyǵynsyz qalǵan balalar sanatyna jatady. Ol mektep-internatta tárbielengen.
Talap qoiýshynyń aitýynsha, qoldanystaǵy zańnamaǵa sáikes, ózi tárbielengen bilim berý uiymy ony 2009 jyly turǵyn úige muqtaj azamat retinde esepke qoiýy kerek bolǵan. Alaida internat bul mindetti oryndamaǵan.
Saldarynan azamat 2020 jyly turǵyn úige muqtajdar esebine óz betinshe tirkelýge májbúr bolǵan. Keiin ol «Otbasy banktiń» turǵyn úi qurylys jinaq bankine qatysty quqyqtyq mirasqory retinde áreket etetin uiymǵa júginip, memlekettik turǵyn úi qorynan baspana alý kezegindegi tirkelgen kúnin ózgertýdi talap etken.
Sotqa júgingen azamat kezekke qoiylǵan kúndi 2020 jyldan 2009 jylǵa aýystyrýdy surady. Taraptar kelissózder nátijesinde ortaq sheshimge kelip, mediatsiialyq kelisim jasasty.
Kelisim boiynsha jaýapker talap qoiýshynyń memlekettik turǵyn úi qorynan baspana alý kezegindegi tirkelgen kúnin 2020 jyldan 2009 jylǵa ózgertýge mindettendi. Sot mediatsiialyq kelisimdi bekitip, taraptar qol jetkizgen ýaǵdalastyq tolyq oryndalǵanyn habarlady.
