Tarazda qyzmettik kóliktiń terezesinen túkirgen politseige qatysty ákimshilik is toqtatyldy. Sot otyrysynda ol túkirgenin moiyndaǵanymen, beinejazbada túkirik qai jerge túskeni kórinbegendikten, kinási dáleldenbegen dep tanyldy, dep habarlaidy dalanews.kz fbrk.kz-ke siltep.
Oqiǵa qalai bolǵan?
Hronika.kz málimetinshe, 2026 jylǵy 2 qarashada saǵat 15:30 shamasynda Tarazdaǵy Kenesary han kóshesinde patrýldik politsiia inspektory qyzmettik kólikten túkirgen.
Bul oqiǵany Instagram jelisinde 318 myńnan asa oqyrmany bar bloger Aian Saýranbaev videoǵa túsirip alǵan. Jazba jariialanǵan soń Jambyl oblysynyń politsiia departamenti qyzmettik tekseris júrgizip, politseige Ákimshilik quqyqbuzýshylyq týraly kodekstiń 434-baby ("Usaq buzaqylyq") boiynsha hattama toltyrǵan.
Sot nege isti toqtatty?
4 qarashada Taraz qalasynyń mamandandyrylǵan ákimshilik quqyqbuzýshylyqtar jónindegi soty 38 jastaǵy aǵa leitenant Erlan Aitjanovqa qatysty isti toqtatqan.
Politsei túkirgenin moiyndap, tamaǵy aýyryp, qatty jótelgen soń solai istegenin jetkizgen. Sot beinejazbadan onyń kólikten túkirgenin kórgenimen, túkirik jerge túsken sáti kadrǵa túspegenin anyqtaǵan. Osyǵan bailanysty sot politseidiń qoǵamdyq jerdi lastaǵany dáleldenbegen degen sheshimge kelgen.
Video avtory Aian Saýranbaev sot sheshimimen kelispei, prokýratýraǵa shaǵym túsirdi.
