Qazaqstanda shetel azamattaryna jeke sáikestendirý nómirin (JSN) smartfon arqyly onlain rásimdeýge múmkindik beretin pilottyq joba iske qosyldy. Endi ótinish berý úshin Halyqqa qyzmet kórsetý ortalyǵyna barýdyń qajeti joq. Jańa tártip 2026 jylǵy 9 qarashadan bastap qoldanysqa engizildi, dep habarlaidy dalanews.kz.
Ishki ister ministrliginiń buiryǵyna sáikes, QazETA mobildi qosymshasy arqyly JSN rásimdeý bir jumys kúni ishinde júzege asyrylady.
Ótinish berý úshin shetel azamaty aldymen QazETA qosymshasyna tirkelip, jeke derekterin óńdeýge kelisim berýi kerek. Sondai-aq jeke basyn kýálandyratyn qujatty sýretke túsirip, biometriialyq tekserýden ótýi qajet. Bul kezeńde júie kamera aldynda naqty adam otyrǵanyn anyqtaidy. Budan bólek, ótinish berýshi geolokatsiiaǵa qol jetkizýge ruqsat berip, avtomatty túrde toltyrylǵan saýalnamadaǵy málimetterdi tekseredi.
Alaida JSN-di qashyqtan alý múmkindigi barlyq sheteldikke birdei qoljetimdi bolmaidy. Aldymen júie «Búrkit» derekqory arqyly ótinish berýshiniń Qazaqstan aýmaǵyna zańdy túrde kirgenin tekseredi. Odan keiin IIM qyzmetkerleri qujattardy, engizilgen aqparattyń durystyǵyn jáne ótinish berýshige buǵan deiin JSN berilgen-berilmegenin qaraidy.
Barlyq talap saqtalsa, shetel azamatyna jeke sáikestendirý nómiri beriledi. Daiyn JSN QazETA qosymshasynda MAQ migratsiialyq qyzmetter platformasy arqyly qoljetimdi bolady. Sondai-aq osy jerden tirkeý týraly kýálikti júktep alýǵa bolady.
Ázirge jańa tártip pilottyq joba aiasynda júzege asyrylady. Onyń negizgi maqsaty – shetel azamattaryna JSN berý qyzmetin tsifrlyq formatqa kóshirý.
