Қазақстанда шетел азаматтарына жеке сәйкестендіру нөмірін (ЖСН) смартфон арқылы онлайн рәсімдеуге мүмкіндік беретін пилоттық жоба іске қосылды. Енді өтініш беру үшін Халыққа қызмет көрсету орталығына барудың қажеті жоқ. Жаңа тәртіп 2026 жылғы 9 қарашадан бастап қолданысқа енгізілді, деп хабарлайды dalanews.kz.
Ішкі істер министрлігінің бұйрығына сәйкес, QazETA мобильді қосымшасы арқылы ЖСН рәсімдеу бір жұмыс күні ішінде жүзеге асырылады.
Өтініш беру үшін шетел азаматы алдымен QazETA қосымшасына тіркеліп, жеке деректерін өңдеуге келісім беруі керек. Сондай-ақ жеке басын куәландыратын құжатты суретке түсіріп, биометриялық тексеруден өтуі қажет. Бұл кезеңде жүйе камера алдында нақты адам отырғанын анықтайды. Бұдан бөлек, өтініш беруші геолокацияға қол жеткізуге рұқсат беріп, автоматты түрде толтырылған сауалнамадағы мәліметтерді тексереді.
Алайда ЖСН-ді қашықтан алу мүмкіндігі барлық шетелдікке бірдей қолжетімді болмайды. Алдымен жүйе «Бүркіт» дерекқоры арқылы өтініш берушінің Қазақстан аумағына заңды түрде кіргенін тексереді. Одан кейін ІІМ қызметкерлері құжаттарды, енгізілген ақпараттың дұрыстығын және өтініш берушіге бұған дейін ЖСН берілген-берілмегенін қарайды.
Барлық талап сақталса, шетел азаматына жеке сәйкестендіру нөмірі беріледі. Дайын ЖСН QazETA қосымшасында MAQ миграциялық қызметтер платформасы арқылы қолжетімді болады. Сондай-ақ осы жерден тіркеу туралы куәлікті жүктеп алуға болады.
Әзірге жаңа тәртіп пилоттық жоба аясында жүзеге асырылады. Оның негізгі мақсаты – шетел азаматтарына ЖСН беру қызметін цифрлық форматқа көшіру.
