Astanada qoǵamdyq kólikte jol júrý aqysy qolma-qol aqshasyz tólem kezinde 110 teńgeden 150 teńgege deiin kóterilýi múmkin. Jańa tarifti jeltoqsannyń ortasynan bastap engizý usynylyp otyr, dep habarlaidy dalanews.kz.
Qala ákimdiginiń túsindirýinshe, elordada 90 teńgelik tarif 2014 jyly bekitilgen. Sodan beri jolaqy bir ret qana qaita qaralyp, qazirgi ýaqytta 110 teńgeni quraidy.
Alaida sońǵy 12 jylda jolaýshylar tasymalyna ketetin negizgi shyǵyndar aitarlyqtai ósken. Máselen, 2014 jyly dizel otynynyń bir litri shamamen 107 teńge bolsa, qazir 329 teńgege jetken. Iaǵni janarmai baǵasy úsh eseden astam qymbattaǵan.
Avtobýs júrgizýshileriniń jalaqysy da ósken. 2014 jyly olardyń ortasha eńbekaqysy 100–150 myń teńge shamasynda bolsa, qazir avtobýs klasy men jumys kestesine qarai 700 myń teńgeden bastalady.
Budan bólek, qosalqy bólshekterdiń, avtokólik shinalarynyń, akkýmýliatorlardyń, tehnikalyq qyzmet kórsetý men jóndeý jumystarynyń, sondai-aq jańa avtobýstardyń baǵasy artqan.
Soǵan qaramastan, elordada qoǵamdyq kólik parkin jańartý jumystary jalǵasyp jatyr. Sońǵy úsh jylda tasymaldaýshylar qaýipsizdik, jailylyq jáne ekologiialyq talaptarǵa sai keletin 1127 jańa avtobýs satyp alǵan.
Ákimdik tarif ózgergen jaǵdaida da halyqtyń áleýmettik osal sanattaryna arnalǵan jeńildikter saqtalatynyn atap ótti.
Atap aitqanda, Uly Otan soǵysynyń ardagerleri men olarǵa teńestirilgen azamattar, zeinetkerler, kópbalaly analar men otbasylar, múgedektigi bar adamdar, 18 jasqa deiingi múgedektigi bar balalar jáne olardyń bir ata-anasy qoǵamdyq kólikte tegin júrý quqyǵyna ie.
Sondai-aq saiasi qýǵyn-súrgin qurbandarynyń jekelegen sanattaryna jáne 1986 jylǵy Jeltoqsan oqiǵasyna qatysyp, zańda belgilengen tártippen aqtalǵan azamattarǵa da jeńildik qarastyrylǵan. 2020 jyldyń naýryzynan bastap Astanada oqityn 18 jasqa deiingi balalar da qoǵamdyq kólikte tegin júredi.
Ákimdik málimetinshe, 2026 jylǵa arnalǵan tarif esebine sáikes, bir jolaýshyny tasymaldaýdyń ortasha eseptik quny qazirgi jolaqydan edáýir joǵary.
Osyǵan bailanysty tasymaldaýshylardyń turaqty jumysyn qamtamasyz etý, avtobýs parkin jańartý jáne marshrýt jelisin damytý maqsatynda jeltoqsannyń ortasynan bastap qolma-qol aqshasyz tólem kezindegi jolaqyny 150 teńgege deiin kóterý usynylyp otyr.
