6 qarashada Shyǵys Qazaqstan oblysynda Quryltai depýtattary men Qazaqstan Halyq Keńesiniń músheleri turǵyndarmen, eńbek ujymdarymen jáne jastarmen kezdesip, Memleket basshysynyń Joldaýynda belgilengen mindetterdi talqylady. Glýbokoe aýdany men Ridder qalasyn qamtyǵan kezdesýlerde áleýmettik jáne kommýnaldyq infraqurylym, densaýlyq saqtaý, ǵylym, kásipkerlik pen jastardyń múmkindikteri sóz boldy, dep habarlaidy dalanews.kz.
Glýbokoe aýdanynda Quryltai depýtaty Erlan Sairov, Qazaqstan Halyq Keńesiniń múshesi Denis Rypakov jáne memlekettik organdar ókilderi aýdan aktivimen, mádeniet jáne sport qyzmetkerlerimen kezdesti. Turǵyndar meditsinalyq qyzmet sapasyn arttyrý, joldardy jóndeý, sapaly aýyzsý, jylýmen qamtý jáne aýyldardy abattandyrý máselelerin kóterdi.
Erlan Sairov óńirde júzege asyrylyp jatqan iri jobalar Shyǵys Qazaqstannyń týristik, kólik jáne tsifrlyq habqa ainalýyna múmkindik beretinin atap ótti. Sondai-aq, aldaǵy úsh jylda áleýmettik infraqurylymǵa 6,5 trln teńge baǵyttalyp, densaýlyq saqtaý salasynda 70 nysan, bilim berý, mádeniet jáne sport baǵyttarynda 50 nysan salý josparlanǵanyn jetkizdi.
Ridderde Quryltai depýtattary Oljas Nuraldinov pen Juldyz Danbaeva qala aktivimen, «Altai» botanikalyq baǵynyń jáne «Vodokanal» kásipornynyń ujymdarymen kezdesti. Jiyndarda qalanyń ónerkásiptik áleýeti, jylý elektr ortalyǵyn jańǵyrtý, sý qubyrlary men káriz jelileriniń turaqty jumysyn qamtamasyz etý máseleleri talqylandy.
«Vodokanal» kásipornynyń sarqyndy sýlardy tazartý qurylystary táýligine 26 myń tekshe metr sýdy óńdeidi. Al jobalyq qýaty 34 myń tekshe metrdi quraidy. Kásiporynǵa 2026–2030 jyldarǵa arnalǵan investitsiialyq baǵdarlama bekitilgen.
«Altai» botanikalyq baǵyndaǵy kezdesýde ǵylymi zertteýlerdi damytý, tabiǵatty qorǵaý jáne eńbek adamdarynyń áleýmettik jaǵdaiy sóz boldy. Depýtattar Joldaýdaǵy mańyzdy bastamalardyń biri retinde eń tómengi jalaqy mólsherin 85 myń teńgeden 110 myń teńgege deiin kóterý máselesin atap ótti. Bul ózgeris shamamen 1,8 million azamattyń tabysyna áser etýi múmkin.
«Altai» botanikalyq baǵynyń ǵylym, monitoring, ekologiialyq aǵartý jáne týrizm bóliminiń mamany Liýdmila Vinokýrova eńbek adamdarynyń ál-aýqatyn arttyrýǵa baǵyttalǵan bastamalardyń mańyzyn atap ótti.
– Eńbekaqy men ómir sapasyna qatysty bastamalar ár adamǵa áser etedi. Bizdiń jumysymyz tabiǵatty, ormandy qorǵaýmen, halyq arasynda ekologiialyq mádenietti qalyptastyrýmen tyǵyz bailanysty. Sondyqtan Joldaýda aitylǵan mindetterdi aldaǵy qyzmetimizge baǵdar retinde qabyldaimyz. Árqaisymyz óz jumysymyzdy jaýapkershilikpen atqarýǵa tyrysamyz, – dedi ol.
Kezdesýlerdiń taǵy bir baǵyty jastarmen dialog boldy. Óskemende «Jastar Rýhy» jastar qanatynyń belsendileri men jastar ókilderi bas qosyp, azamattyq bastamalarǵa qatysý, áleýmettik jaýapkershilik jáne jas býynnyń óńir damýyna qosar úlesi jóninde pikir almasty.
Jalpy, Glýbokoe aýdany men Ridderdegi kezdesýlerde kóterilgen máseleler óńir damýynyń basty mindetteri halyqtyń kúndelikti qajettilikterimen tikelei bailanysty ekenin kórsetti.
