Raiymbek aýdanynyń Saryjaz aýyly Uly dalanyń biregei murasyn dáripteýshilerdiń basyn qosqan mekenge ainaldy. Munda ǵasyrlar boiy jalǵasyp kele jatqan dástúrler zamanaýi sport qozǵalysymen úndesti. Atap aitqanda, «Alataý salburyny – 2026» halyqaralyq qusbegilik týrniriniń shymyldyǵy túrildi. Aýqymdy sharaǵa Qazaqstannyń 11 óńirinen kelgen qusbegiler, sondai-aq Mońǵoliia, Qytai jáne Qyrǵyzstan ókilderi qatysyp, barlyǵy 76 qus baptalyp ákelindi, dep habarlaidy dalanews.kz.
«Asqar taýlary men bai tarihy bar Raiymbek aýdany qanatty ańshylardyń saiysyn ótkizýge óte qolaily meken. Jastar osy ónerge qyzyǵýshylyq tanytyp, balalar ákeleri men tálimgerleriniń jolyn jalǵastyryp jatqanda, qusbegiliktiń bolashaǵy bar. Bizdiń ortaq mindetimiz – baǵa jetpes murany kózdiń qarashyǵyndai saqtap, onyń ómirsheńdigin qamtamasyz etý jáne Qazaqstannyń atyn shetelderge tanytý», – dedi týrnirdiń saltanatty ashylýynda Raiymbek aýdanynyń ákimi Dastan Qudabaev.
Almaty oblysynda ondaǵan jyldar boiy qusbegilerdiń belgili áýletteri qalyptasyp, búrkit pen suńqar salyp ań aýlaý dástúri saqtalyp keledi. Sonymen qatar osy biregei ónerdi jas urpaqqa úiretýge, atadan balaǵa jalǵasqan bilim men tájiribeni jetkizýge jaǵdai jasalýda. Bul baǵytta «Qyran» etnoortalyǵynyń róli erekshe. Al jyl saiynǵy jarystar men ulttyq týrnirlerdiń ótkizilýi óńirdiń Qazaqstandaǵy qusbegilik ónerin damytý ortalyqtarynyń biri retindegi mártebesin nyǵaita túsýde.
«Mundai is-sharalar otandyq jáne sheteldik qonaqtardyń óńirdiń tabiǵi kórikti jerlerine degen qyzyǵýshylyǵyn arttyrady. Almaty oblysynyń týristik tartymdylyǵyn qalyptastyrýǵa, etnomádeni jáne oqiǵaly týrizmdi damytýǵa, sondai-aq halyqaralyq bailanystardy nyǵaitýǵa yqpal etedi», – dep atap ótti oblystyq dene shynyqtyrý jáne sport basqarmasy basshysynyń orynbasary Janserik Ádiahmetov.
Týrnir ótetin alańnyń ulttyq naqyshta bezendirilýi merekeniń erekshe atmosferasyn qalyptastyrdy. Munda dástúrli qazaq úileri tigilip, olardyń birinde taqyryptyq kórme uiymdastyryldy. Qonaqtar men qatysýshylar kórmeden ulttyq turmys buiymdarymen jáne tól ańshylyq mádenietiniń elementterimen tanysýǵa múmkindik aldy.
Sondai-aq qonaqtar men jankúierlerdiń qyzyǵýshylyǵyn qazaqtyń tazy tuqymdy itteriniń kórsetilimdik saiystary týdyrdy.
Jarys barysynda qatysýshylar qanatty ańshylarmen jumys isteý sheberligin úsh sanat boiynsha kórsetedi: búrkit salý, qarshyǵa salý jáne itelgi salý. Ár sanat qusty erekshe baptaýdy, adam men qustyń úilesimdi áreketin, tózimdilik pen kásibi tájiribeni talap etedi.
«Alataý salburyny – 2026» týrniri tól mádenietimizdiń shynaiy qundylyǵy onyń sabaqtastyǵynda ekenin taǵy bir márte kórsetti. Aita keteiik, «Salbýryn» dástúri Qazaqstannyń materialdyq emes mádeni murasynyń ulttyq tizimine 2013 jyly engizilgen. Al 2026 jyly Qazaqstan osy baǵytta taǵy bir mańyzdy qadam jasady: tazy ittermen jáne qyran qustarmen ań aýlaý dástúrlerin biriktiretin «Salbýryn» ulttyq festivali IýNESKO-nyń materialdyq emes mádeni muralar tizimine engizý jónindegi baǵalaý organynyń oń usynymyn aldy. Túpkilikti sheshim biylǵy jeltoqsan aiynda qabyldanady dep kútilýde, – dedi «Qusbegilik» respýblikalyq federatsiiasynyń vitse-prezidenti Baǵdat Múptekekyzy.
Jarystyń alǵashqy kúniniń baǵdarlamasyna ańshy qustardyń irikteý kezeńderi engizilgen. Atap aitqanda, búrkitterdi iesiniń qolyna shaqyrý, arnaiy shyrǵaǵa salý, sondai-aq qarshyǵa men itelgini qolǵa shaqyrý jáne kógershinge salý saiystary ótedi.
7 qarashada tájiribelik saiystardyń jartylai finaldyq jáne finaldyq kezeńderi ótip, qusbegiler óz qustarynyń ańshylyq qasietterin kórsetedi. Týrnir qorytyndy shyǵarý jáne jeńimpazdar men júldegerlerdi saltanatty marapattaý rásimimen aiaqtalady.
