Qazaqstanda perzenthana, balalar aýrýhanasy jáne jedel járdem qyzmetteriniń 47 basshysy men orynbasary attestatsiia kezinde qajetti upai jinai almaǵan. Bul – test tapsyrǵandardyń 20 paiyzy, dep habarlaidy dalanews.kz.
Testileý 14 qazanda bastalǵan. 2 qarashaǵa deiin 15 óńirden 235 adam synaq tapsyrǵan. Bul attestatsiiadan ótýi tiis mamandardyń 72,1 paiyzy. Test tapsyrǵandardyń 188-i qajetti upai jinap, synaqtan ótken. Al 47 adam belgilengen mejege jete almaǵan. Olardyń 25-i – meditsinalyq uiym basshysy, 22-si – orynbasary. Taǵy 27 adam testileýge múlde kelmegen.
Testileýden óte almaǵandar Aqmola, Mańǵystaý jáne Qostanai oblystarynda kóp. Osy úsh óńirdegi kórsetkish barlyq tómen nátije kórsetken qatysýshylardyń 55,3 paiyzyna teń. Al Astana men Pavlodar oblysynda test tapsyrǵandardyń barlyǵy qajetti upai jinaǵan.
Qoldanystaǵy erejege sáikes, testileýden óte almaǵan mamandar kelesi kezeńge, iaǵni áńgimelesýge qatysa almaidy. Olar alty aidan keiin qaita synaq tapsyra alady.
Aita keteiik, attestatsiia tek perzenthana, balalar aýrýhanasy jáne jedel járdem stantsiialarynyń basshylary men olardyń orynbasarlaryna qatysty. Testileý 2026 jyldyń jeltoqsan aiynyń sońyna deiin jalǵasady. Qazir jariialanǵan sandar – alǵashqy kezeńniń aldyn ala qorytyndysy.
