Qazaqstanda áleýmettik saiasatty túbegeili qaita qarap, memlekettik kómekti shyn muqtaj azamattarǵa baǵyttaý qajet. Prezident Qasym-Jomart Toqaev «Jańa tarihi kezeńdegi Qazaqstannyń ózekti mindetteri» atty Qazaqstan halqyna Joldaýynda áleýmettik tólemder júiesindegi kemshilikterge toqtalyp, memlekettik qoldaýdyń tiimdiligin arttyrý mindetin qoidy, dep habarlaidy dalanews.kz.
Memleket basshysynyń aitýynsha, ótken jyldary áleýmettik kómekti shamadan tys kóbeitý memlekettik basqarýdaǵy qatelikter men júieli máselelerdi búrkemeleýdiń bir tásiline ainalǵan. Sonyń saldarynan biýdjet qarajaty tiimsiz jumsalyp, kei jaǵdaida áleýmettik kómekke muqtaj emes otbasylar da túrli járdemaqy men jeńildikterge ie bolǵan.
Áleýmettik kómek júiesinde qandai kemshilikter bar?
Prezidenttiń pikirinshe, áleýmettik tólemderdiń negizsiz kóbeiýi memleket resýrstarynyń tiimsiz jumsalýyna ákelgen. Al bul ýaqytta mektepter men aýrýhanalardyń tapshylyǵy artyp, áleýmettik infraqurylym máseleleri tolyq sheshilmei qalǵan.
Memleket basshysy mundai jaǵdai qoǵamda masyldyq kóńil-kúidiń qalyptasýyna yqpal etkenin atap ótti. Budan bólek, áleýmettik qamsyzdandyrý júiesinde zańsyz áreketter men sybailas jemqorlyq faktileri de bolǵan.
Prezident negizsiz jeńildikter men járdemaqylardyń shamadan tys kóptigin memlekettik apparattyń álsizdigimen jáne uzaq merzimdi josparlaýdaǵy kemshiliktermen bailanystyrdy.
Onyń aitýynsha, biýdjet qarajaty esebinen azamattardyń kóńilin tabýǵa baǵyttalǵan sharalar eldiń turaqty damýyna kedergi keltirýi múmkin. Sondyqtan áleýmettik saiasatty qysqa merzimdi máselelerdi sheshý quraly retinde ǵana qarastyrmai, strategiialyq maqsattarǵa baǵyttaý qajet.
Memlekettik kómek kimderge berilýi tiis?
Qasym-Jomart Toqaev memlekettik qoldaýdyń negizgi qaǵidatyn naqtylady. Onyń aitýynsha, biýdjet esebinen beriletin áleýmettik kómek eń aldymen shyn máninde muqtaj azamattarǵa baǵyttalýy kerek.
Qaitalap aitamyn: memlekettik kómek shyn muqtaj adamdarǵa ǵana berilýge tiis. Úkimettiń aldynda turǵan basty mindettiń biri – osy, – dedi Prezident.
Bul rette áleýmettik saiasatty ózgertý barysynda azamattardyń jaǵdaiyn jan-jaqty eskerý mańyzdy. Sebebi áleýmettik tólemder men jeńildikterge qatysty kez kelgen sheshim halyqtyń turmys deńgeiine tikelei áser etýi múmkin. Memleket basshysy qoǵamda bul máselege qatysty túrli pikir bar ekenin de atap ótti. Azamattar ózderin alańdatqan máselelerdi ashyq kóterip jatqandyqtan, reformalardy asyǵys qabyldaýǵa bolmaidy.
Áleýmettik reformalar qalai júzege asyrylýy kerek?
Prezident Úkimetke áleýmettik qoldaýdyń jańa tásilderin engizý kezinde baiypty ári jan-jaqty saraptalǵan sheshimder qabyldaýdy tapsyrdy.
Onyń pikirinshe, kez kelgen reforma tereń zerttelip, azamattardyń áleýmettik jaǵdaiyna yqtimal áseri aldyn ala baǵalanýy qajet. Ásirese jańa áleýmettik kómek tetikteri men olardy basqarýǵa arnalǵan aqparattyq júielerdiń jumysy muqiiat tekserilýi tiis.
Memleket basshysy jańa jobalardy birden búkil el kóleminde engizbei, aldymen pilottyq rejimde synaqtan ótkizýdi usyndy. Tek tiimdiligi dáleldengennen keiin ǵana olardy keńinen qoldanýǵa bolady.
Mundai tásil reformalardyń yqtimal kemshilikterin aldyn ala anyqtap, áleýmettik qoldaýǵa muqtaj azamattardyń múddesin qorǵaýǵa múmkindik beredi.
Áleýmettik memlekettiń basty maqsaty – tólemge táýeldilik emes
Prezident áleýmettik memlekettiń máni azamattardy járdemaqy men áleýmettik tólemderge táýeldi etý emes ekenin erekshe atap ótti.
Memlekettiń negizgi mindeti – halyqtyń turmys sapasyn arttyrý, azamattardyń ál-aýqatyn jaqsartý jáne olardyń óz múmkindikterin júzege asyrýyna jaǵdai jasaý.
Osy turǵyda adam kapitalynyń sapasyn arttyrý, bilim berý men densaýlyq saqtaý salalaryn damytý, óskeleń urpaqtyń jan-jaqty qalyptasýyna qolaily orta qurý mańyzdy baǵyttardyń biri bolyp qala beredi. Qasym-Jomart Toqaevtyń Joldaýdaǵy ustanymynan áleýmettik saiasattyń basty baǵyty memlekettik kómekti kóbeitý ǵana emes, ony naqty muqtaj adamdarǵa jetkizý jáne uzaq merzimdi áleýmettik damýǵa jaǵdai jasaý ekenin ańǵarýǵa bolady.
Al Úkimettiń aldynda turǵan negizgi mindet – áleýmettik qoldaý júiesin jetildirý kezinde biýdjet qarajatynyń tiimdi jumsalýyn qamtamasyz etip, halyqtyń osal toptarynyń múddesin qorǵaý.
