Aqtóbede er adam burynǵy jubaiyn óltirdi degen kúdikpen ustaldy. Qaiǵyly oqiǵa 5 qarasha kúni bolǵan. Marqumnyń artynda kishkentai qyzy qalǵan, dep dalanews.kz tilshisi Stan.kz basylymyna silteme jasap habarlaidy.
Oqiǵa týraly alǵashqy aqparat áleýmettik jelide taraǵan. Qaza tapqan áieldiń týystary qaiǵyly jaǵdaidy jariialap, jaqyn adamynan aiyrylǵanyn jetkizgen. Marqumnyń jaqyndarynyń biri burynǵy erli-zaiyptylardyń ortaq balasy bolǵanyn aityp, bolǵan jaǵdaiǵa bailanysty janaiqaiyn bildirdi.
"Keshe túnde Aqtóbede meniń ápkemdi burynǵy kúieýi óltirip ketti. Ekeýiniń ortaq balasy bar edi. Erkekter senderge ne bolǵan? Jap-jas qyzdy qorlap óltirip tastady, ózi túrmege ketti, kishkentai qyzy jetim qaldy", – delingen jazbada.
Áieldiń taǵy bir týysy da áleýmettik jelidegi paraqshasynda qaraly habarmen bólisti. Ol marqumnyń mezgilsiz qazasy búkil otbasy úshin aýyr soqqy bolǵanyn jazǵan.
"Mezgilsiz ólim, mezgilsiz qaiǵy, mezgilsiz joqtaý. Janym-aý, adam qolynan bolaryn kim bilgen?! Jap-jas ediń ǵoi. Júregim qars aiyrylyp, qol-aiaǵym bailanyp otyr. Tátelep artymnan ergen sińlim ediń, baýyrym ediń. Seniń ómirińdi alǵan adamnyń Alla jazasyn bersin. Botam-aý, artyńda qalǵan perishteni aiap otyrmyn. Shybyn jany shyryldap qalǵan áke-sheshe, ata-ájeńdi aiap otyrmyn. Seni óltirgen aiýandy aralaryńdaǵy perishteniń kóz jasy aiamasyn", – dep jazba qaldyrdy marqumnyń jaqyny.
Aqtóbe oblystyq Politsiia departamenti áiel ólimine qatysty aqparatty rastady. Quqyq qorǵaý organdary kúdiktiniń ustalyp, ýaqytsha ustaý izoliatoryna qamalǵanyn habarlady. Politsiia departamenti bastyǵynyń orynbasary Áset Qalievtiń aitýynsha, qylmysqa burynǵy erli-zaiyptylar arasyndaǵy turmystyq janjal sebep bolýy múmkin.
"Atalǵan derek boiynsha qylmystyq is qozǵaldy. Politsiia qyzmetkerleri kúdiktiniń jeke basyn anyqtap, ony ustady. Qazir kúdikti ýaqytsha ustaý izoliatoryna qamaldy. Aldyn ala málimet boiynsha, qylmys burynǵy erli-zaiyptylar arasynda turmystyq janjal saldarynan bolǵan. Qazir oqiǵanyń barlyq mán-jaiyn anyqtaýǵa baǵyttalǵan qajetti tergeý áreketteri júrgizilýde. Tergeý múddesine bailanysty ózge aqparat jariia etilmeidi", – dep habarlady Áset Qaliev.
Sonymen qatar politsiia buǵan deiin atalǵan azamattardyń arasyndaǵy otbasylyq janjaldarǵa qatysty quqyq qorǵaý organdaryna eshqandai aryz nemese shaǵym túspegenin málimdedi.
Qazirgi ýaqytta qylmystyq is boiynsha tergeý amaldary jalǵasyp jatyr. Oqiǵanyń naqty mán-jaiy anyqtalýda.
