Politsiia men qutqarýshylar Samara - Shymkent tasjolynda 15 Tájikstan azamatyn evakýatsiialady, dep habarlaidy dalanews.kz.
6 qarashada saǵat 01:11 shamasynda Aqtóbe oblysynda respýblikalyq mańyzy bar Samara - Shymkent tasjolynyń 1214-shaqyrymynda patrýldik politsiia jasaǵy jol jieginde toqtap turǵan avtobýsty baiqaǵan.
Tekseris barysynda Tájikstan Respýblikasynan Resei Federatsiiasyna baǵyt alǵan Van Hool avtobýsy tehnikalyq aqaýǵa bailanysty jolda toqtap qalǵany anyqtalǵan. Avtobýs salonynda eki júrgizýshi men 15 jolaýshy bolǵan. Olardyń altaýy - áiel, tórteýi - bala, beseýi - er adam. Barlyǵy - Tájikstan Respýblikasynyń azamattary.
Patrýldik politsiia rotasynyń qyzmetkerleri Yrǵyz aýdanynyń tótenshe jaǵdailar qyzmeti mamandarymen birlesip, jolaýshylardy qaýipsiz jerge evakýatsiialady. Olar Yrǵyz aýylynyń qiylysynda ornalasqan meshitke ornalastyryldy.
Olardyń ómiri men densaýlyǵyna qaýip tónip turǵan joq.
