Almaty oblystyq balalar klinikalyq aýrýhanasynda magnit jutyp qoiǵan tórt jáne jeti jastaǵy eki aǵaiyndyǵa shuǵyl ota jasaldy. Dárigerler balalardyń aǵzasynan barlyǵy 32 magnit alyp shyqqan. Bul týraly meditsinalyq mekeme habarlady, dep habarlaidy dalanews.kz.
Balalar aýrýhanaǵa ishi úzdiksiz aýyryp, mazasyzdanǵan soń jetkizilgen. Tekserý kezinde olardyń asqazan-ishek joldarynan birneshe magnit anyqtalǵan. Dárigerler jaǵdaidyń qaýipti ekenin eskerip, balalardy shuǵyl túrde aýrýhanaǵa jatqyzǵan.
Tórt jastaǵy balanyń asqazany men ash isheginiń ártúrli bóliginen 29 magnit tabylǵan. Onyń 15-i asqazanynan, qalǵan 14-i ash isheginen alynǵan. Magnitter bir-birinen alshaq ornalasqanyna qaramastan, bir-birine tartylyp, ishekti qysyp turǵan.
Ota kezinde hirýrgter balanyń isheginen Mekkel divertikýlyn da alyp tastaǵan. Bul – ishektegi týabitti qalta tárizdi ósindi.
Al jeti jastaǵy balanyń toq isheginen bir-birine jabysyp qalǵan úsh magnit tabylǵan. Dárigerler laparoskopiialyq ádispen ota jasap, magnitterdi soqyr ishek tusyna jyljytyp, sol jerden alyp shyqqan. Bul tásil ishekti tikelei kespei-aq bógde zattardy alýǵa múmkindik beredi.
Oblystyq balalar klinikalyq aýrýhanasynyń hirýrgi Asqar Qanazovtyń aitýynsha, balalar magnitterdi úide oinap júrip abaisyzda jutyp qoiǵan. Ata-anasy der kezinde jedel járdem shaqyryp, balalardy meditsinalyq mekemege jetkizgen.
Dáriger birneshe magnitti jutyp qoiý balanyń ómirine qaýip tóndirýi múmkin ekenin eskertti. Sebebi magnitter ishektiń ártúrli bóliginde ornalassa da, bir-birine tartylyp, ishekti qysady. Sonyń saldarynan qan ainalymy buzylyp, ishek zaqymdanýy nemese tipti tesilip ketýi múmkin.
Balalar magnit jutqannan keiin shamamen bes saǵat ótken soń aýrýhanaǵa túsken. Hirýrgtiń sózinshe, olardyń ýaqytyly jetkizilýi men meditsina mamandarynyń úilesimdi jumysynyń arqasynda aýyr asqynýdyń aldyn alǵan.
Otadan keiin eki bala da qaita tekserilip, aǵzalarynda qosymsha magnit joq ekeni anyqtalǵan. Toǵyz kún emdelgen soń olar úilerine shyǵaryldy.
Dárigerler ata-analarǵa magnitti konstrýktorlar men usaq oiynshyq bólshekterin balalardyń qoly jetpeitin jerde saqtaýǵa keńes beredi. Sondai-aq balalardyń qandai oiynshyqtarmen oinaitynyn baqylaý qajettigin eskertedi.
Mamandardyń aitýynsha, magnit jutqan balada alǵashqy kezde eshqandai belgi bolmaýy múmkin. Keiin ishtiń aýyrýy, kebýi, júrek ainý, qusý, tábettiń tómendeýi, mazasyzdyq, dene qyzýynyń kóterilýi jáne úlken dárettiń buzylýy baiqalýy yqtimal.
Dárigerler balanyń magnit jutqanyna kúdik bolsa, belgilerdiń paida bolýyn kútpei, dereý meditsinalyq kómekke júginýge shaqyrady.
