Pavlodar oblysyndaǵy túzeý mekemeleriniń birinde 20 jastaǵy sottalýshy qaitys boldy. Aldyn ala málimet boiynsha, jas jigit ózine qol jumsaǵan bolýy múmkin, dep habarlaidy dalanews.kz.
Belgili bolǵandai, marqum 2026 jyldyń sáýir aiynda 12 jylǵa bas bostandyǵynan aiyrylǵan. Onyń qylmystyq isi 2025 jyly bolǵan oqiǵaǵa bailanysty qozǵalǵan. Taratylǵan aqparatqa sáikes, sol kezde 19 jastaǵy jigit Instagram áleýmettik jelisi arqyly 15 jastaǵy mektep oqýshysymen tanysqan. Keiin olardyń arasynda jynystyq qatynas bolǵan.
Bul jaǵdaidan habardar bolǵan qyzdyń anasy quqyq qorǵaý organdaryna aryz túsirgen.
Qazaqstan zańnamasyna sáikes, 16 jasqa tolmaǵan adammen jynystyq qatynasqa túsý qylmystyq jaýapkershilikke ákep soǵady. Kámeletke tolmaǵan adamnyń kelisimi mundai áreketti zańdy etpeidi.
Isti qaraǵan sot 2026 jyldyń sáýir aiynda aiyptalýshyny kináli dep tanyp, 12 jylǵa bas bostandyǵynan aiyrý jazasyn taǵaiyndaǵan. Alaida arada birneshe ai ótken soń 20 jastaǵy sottalýshynyń jazasyn ótep jatqan mekemede kóz jumǵany týraly aqparat tarady.
Pavlodar oblysynyń Qylmystyq-atqarý júiesi departamenti oqiǵaǵa qatysty aldyn ala málimet berdi. Vedomstvonyń habarlaýynsha, jas jigittiń ólimine ózine qol jumsaý sebep bolýy múmkin.
Degenmen bul boljam ázirge túpkilikti rastalǵan joq.
Qazirgi ýaqytta sottalýshynyń ólimine bailanysty qylmystyq is qozǵaldy. Quqyq qorǵaý organdary oqiǵanyń barlyq mán-jaiyn anyqtap, ólimniń naqty sebebin tekserip jatyr.
