Qazaqstanda 2020–2024 jyldary qaitys bolǵan, habar-osharsyz ketken jáne shetelge turaqty turýǵa kóship ketken 60 myńnan astam adamǵa jalpy somasy 21 mlrd teńge zeinetaqy tólengen. Mundai zańbuzýshylyqtar men qarjylyq táýekelderdi Joǵary aýditorlyq palata anyqtady, dep habarlaidy dalanews.kz.
Aýdit Eńbek jáne halyqty áleýmettik qorǵaý ministrliginiń 2025 jylǵy shyǵystaryn qamtyǵan. Aýditorlardyń málimetinshe, zańsyz tólemderdiń negizgi sebepteriniń biri – ministrlik derekter bazasynyń basqa memlekettik organdardyń aqparattyq júielerimen avtomatty túrde integratsiialanbaýy. Olardyń qatarynda Syrtqy ister ministrligi, Ulttyq qaýipsizdik komiteti jáne Bas prokýratýra bar.
Aýdit barysynda sheteldikter men azamattyǵy joq adamdarǵa tólenetin zeinetaqy máselesi de qaralǵan. VAP dereginshe, Qazaqstanda 17 myńnan astam sheteldik pen azamattyǵy joq adam zeinetaqy alǵan. Olarǵa jyl saiyn 9 mlrd teńgeden astam qarajat baǵyttalǵan.
Olardyń arasynda alys sheteldiń 47 elinen kelgen 2818 azamat bar. Atap aitqanda, Qazaqstannan zeinetaqy alǵandardyń qatarynda Qytaidyń 1650 azamaty, Aýǵanstannyń 17, Úndistannyń bes, Nigeriianyń eki jáne Vetnamnyń bir azamaty bolǵan.
Aýditorlar muny sheteldik azamattardyń óz elinde zeinetaqy alatynyn jáne eńbek ótiliniń rastalýyn tekserýge múmkindik beretin halyqaralyq kelisimderdiń joqtyǵymen bailanystyrady. Sonyń saldarynan respýblikalyq biýdjet qarajatynyń negizsiz jumsalý qaýpi týyndaǵan.
Joǵary aýditorlyq palata zańsyz alynǵan tólemder qaitarylýǵa tiis ekenin atap ótti.
Buǵan deiin Eńbek ministrligi zeinetaqy men járdemaqy taǵaiyndaý tártibin qatańdatýdy usynǵan. Usynys boiynsha, tólemder tek Qazaqstanda turaqty turatyn jáne turǵylyqty jeri boiynsha tirkelgen azamattarǵa berilýi kerek.
Mundai sharalar keibir zeinetkerlerdiń bir mezgilde birneshe memleketten tólem alýy múmkin ekeni anyqtalǵan jaǵdailarmen túsindirilgen.
