Abai oblysyna jumys sapary aiasynda delegatsiia músheleri túrli sala ókilderimen birqatar kezdesý ótkizdi. Kezdesýlerde Memleket basshysynyń Joldaýyndaǵy negizgi mindetter, infraqurylymdy damytý, halyqtyń ál-aýqatyn arttyrý, pedagogter men áleýmettik qyzmetkerlerdi qoldaý, sondai-aq otandyq óndiristiń áleýetin keńeitý máseleleri talqylandy, dep habarlaidy dalanews.kz.
Joldaýdy talqylaý Shákárim ýniversitetiniń stýdentteri men oqytýshylarymen kezdesýden bastaldy. Oǵan Qazaqstan Halyq Keńesiniń múshesi Nurtai Sabilianov pen Quryltai depýtaty Airat Bazenov qatysty. Kezdesý barysynda jastardyń kásibi damýy, bilikti kadr daiarlaý, tsifrlandyrý jáne jasandy intellekt tehnologiialaryn engizý máseleleri sóz boldy.
Nurtai Sabilianov óńir úshin ózekti infraqurylymdyq máselelerge, sonyń ishinde joldardyń jaǵdaiyna, turǵyn úimen qamtýǵa, sýmen jáne jylýmen jabdyqtaýǵa toqtaldy.
– Memleket basshysy óz Joldaýynda infraqurylymdy damytýǵa erekshe nazar aýdardy. Semei qalasynda joldardyń jai-kúii, turǵyn úimen qamtý, sondai-aq sý jáne jylý júieleriniń úzdiksiz jumysyna qatysty sheshimin kútken máseleler bar. Osyǵan bailanysty Prezident mundai problemalardy keshendi sheshý úshin Ulttyq qordan 6,5 trln teńge bólýdi tapsyrdy, – dedi ol.
Budan keiin delegatsiia Semei biznes jáne servis kolledjine baryp, pedagogikalyq ujymmen jáne oqý ornynyń ákimshiligimen kezdesti. Munda muǵalimderdiń quqyqtaryn qorǵaý, pedagog mártebesin arttyrý jáne inkliýzivti bilim berýdi damytý máselelerine basymdyq berildi.
Nurtai Sabilianov muǵalimderdi artyq eseptilikten jáne qyzmetine tán emes mindetterden bosatý úshin zańnamany odan ári jetildirý qajettigin atap ótti. Al Airat Bazenov erekshe bilim berý qajettilikteri bar balalardyń sapaly bilim alýyna jaǵdai jasaý mańyzdy ekenin aitty.
Óńirdiń áleýmettik sala ókilderimen ótken kezdesýde áleýmettik qyzmetterdiń sapasyn arttyrý, muqtaj azamattarǵa ataýly qoldaý kórsetý jáne sala mamandarynyń jalaqysyn kóterý máseleleri talqylandy.
Abai oblysy boiynsha múgedektigi bar adamdardy abilitatsiialaý jáne ońaltý ortalyǵynyń direktory Aiqyn Bitimbaev áleýmettik qyzmetkerlerdiń eńbekaqysyna qatysty másele kóterdi. Onyń aitýynsha, sala mamandarynyń jalaqysy shamamen 200 myń teńgeni quraidy.
– Ońaltý ortalyqtary qyzmetkerleriniń jalaqysyn kóterý týraly máseleni oryndy dep sanaimyn. Qazaqstan Halyq Keńesi aiasynda qurylǵan komissiialar men komitetter arqyly bul usynysty Eńbek jáne halyqty áleýmettik qorǵaý ministrligine joldaimyz. Sonymen qatar Úkimet deńgeiinde de kóteremiz. Bul mamandardyń atqaryp júrgen jumysynyń qanshalyqty aýyr ekenin eskerý qajet, – dedi Nurtai Sabilianov.
Kezdesýde erekshe qajettilikteri bar balalarǵa arnalǵan ońaltý mekemeleriniń tapshylyǵy da aityldy. Abai oblysynda mundai balalardyń sany shamamen 6,5 myńǵa jetedi. Nurtai Sabilianov kóterilgen másele quzyrly organdarǵa jetkiziletinin málimdedi.
Dýman Orynbekov ýniversitet stýdentterin áleýmettik ortalyqtardyń jumysyna tartýdy usyndy. Atap aitqanda, egde jastaǵy adamdarǵa smartfondy jáne elektrondy memlekettik qyzmetterdi paidalanýdy úiretetin sabaqtar uiymdastyrý bastamasyn kóterdi.
«SemeyCement» óndiristik kompaniiasynyń ujymymen ótken kezdesýde Prezident Joldaýynda belgilengen áleýmettik-ekonomikalyq mindetter talqylandy. Jiynǵa QR Energetika vitse-ministri Ilias Baqytjan, QR Ulttyq ekonomika ministrligi Arnaiy baǵdarlamalar komitetiniń tóraǵasy Baýyrjan Syzdyqov jáne Qazaqstan Halyq Keńesiniń múshesi Dýman Orynbekov qatysty.
Kezdesý barysynda halyqtyń naqty tabysyn arttyrý, shaǵyn jáne orta biznesti qoldaý, infraqurylymdy jańǵyrtý, salyq jáne biýdjet saiasaty máseleleri qozǵaldy. Sondai-aq 2027 jylǵy 1 qańtardan bastap eń tómengi jalaqyny 85 myń teńgeden 110 myń teńgege deiin kóterý josparlary talqylandy.
Óndiristik tseh bastyǵy Tarhan Jaqypbaev otandyq tsement óndirisiniń qurylys salasyndaǵy mańyzyn atap ótti. Onyń aitýynsha, 1958 jyldan beri jumys istep kele jatqan kásiporyn elimizdi sapaly ónimmen qamtamasyz etip keledi. Al qurylys qarqynynyń artýy zaýyttyń odan ári damýyna jańa múmkindikter ashady.
Delegatsiia Semei qalasyndaǵy ÓEK ujymymen de kezdesti. Memlekettik organdar ókilderi energetiktermen Qazaqstannyń energetikalyq qaýipsizdigin nyǵaitý, otandyq generatsiiany damytý, qýat kózderin arttyrý jáne elektr energiiasyn jinaqtaý júielerin engizý jónindegi strategiialyq mindetterdi talqylady.
Ásirese data-ortalyqtar men jasandy intellekt infraqurylymynyń damýyna bailanysty elektr energiiasyn tutyný kóleminiń artýyna nazar aýdaryldy. Sonymen qatar jańartylatyn energiia kózderin damytý perspektivalary men eldiń energetikalyq teńgerimin jańartý qajettiligi qarastyryldy. Qatysýshylar energetikalyq turaqtylyqtyń ekonomikalyq damýǵa jáne halyqtyń ál-aýqatyna áserin de sóz etti.
Osylaisha, kezdesýler Prezident Joldaýyndaǵy bilim berý men áleýmettik qoldaýdan bastap, ónerkásip pen energetikalyq qaýipsizdikke deiingi birneshe mańyzdy baǵytty qamtydy. Qatysýshylar óńirdegi ózekti máselelerdi talqylap, delegatsiia ókilderine saýaldaryn joldap, belgilengen mindetterdi iske asyrý jóninde usynystaryn bildirdi.
