Kásipker Bolat Ótemuratovtyń negizgi investory sanalatyn «Vernyi Kapital» kompaniialar toby OLX Qazaqstannyń 100 paiyzyn satyp alý jónindegi mámileni aiaqtady. Satyp alý Beeline Qazaqstan arqyly júzege asyryldy, dep habarlaidy dalanews.kz.
Mámile OLX Group kompaniiasynan barlyq retteýshi rásimder aiaqtalǵannan keiin jasaldy. Onyń jalpy quny 81 mln dollardy qurady. Bul somaǵa mámileni aiaqtaý kezindegi shamamen 6 mln dollar kólemindegi túzetýler de kiredi.
«Vernyi Kapital» ókilderiniń aitýynsha, bul satyp alý investitsiialyq portfeldi keńeitýge jáne tsifrlyq servister naryǵyndaǵy toptyń pozitsiiasyn nyǵaitýǵa baǵyttalǵan.
«Bul biz úshin portfeldi keńeitý ǵana emes, kúndelikti qoldanylatyn tsifrlyq servister infraqurylymyna salynǵan investitsiia. Habarlandyrý platformalary paidalanýshylardy, shaǵyn biznesti jáne jergilikti naryqtardy bailanystyryp, ekonomikada mańyzdy ról atqarady. Bizdiń mindetimiz – platformanyń qalyptasqan artyqshylyqtaryn saqtai otyryp, onyń aýqymyn keńeitý jáne tehnologiialyq áleýetin kúsheitý», – dedi «Vernyi Kapital» tobynyń investory Bolat Ótemuratov.
Mámile nátijesinde Beeline Qazaqstan tsifrlyq qyzmetter ekojúiesin keńeitip, paidalanýshylarǵa ózara bailanysty servisterdiń aýqymdy túrin usyna alady.
VEON kompaniiasynyń bas atqarýshy direktory Kaan Terzioglý OLX Qazaqstandy satyp alý tsifrlyq operator strategiiasyn júzege asyrýdaǵy mańyzdy qadam ekenin atap ótti.
Kompaniia málimetinshe, OLX Qazaqstan ai saiyn shamamen 9 mln belsendi paidalanýshyny qamtidy. Bul – eldegi belsendi internet aýditoriiasynyń 52 paiyzdan astamy. Platformada taýarlar men qyzmetter, jumys oryndary, avtomobilder jáne jyljymaityn múlik boiynsha habarlandyrýlar jariialanady.
Aita keteiik, Beeline Qazaqstannyń OLX-ti satyp alý týraly kelisimi alǵash ret 2025 jylǵy qazanda jariialanǵan. Ol kezde mámileniń bastapqy quny 75 mln dollar dep kórsetilgen.
