Mańǵystaý oblysynda «Aqtaý – Qalamqas» tasjolynda avtobýs qaǵyp ketken «Mańǵystaýmunaigaz» kompaniiasynyń vahtalyq jumysshysy oqiǵa ornynda kóz jumdy, dep habarlaidy dalanews.kz.
Óńirlik politsiia departamentiniń málimetinshe, jol-kólik oqiǵasy 6 qarashada bolǵan. Daewoo avtobýsynyń júrgizýshisi joldan ótip bara jatqan jaiaý júrginshini qaǵyp ketken. Er adam alǵan jaraqattarynan oqiǵa ornynda qaitys bolǵan.
Atalǵan derek boiynsha qylmystyq is qozǵaldy. Avtobýs arnaiy turaqqa qoiylǵan. Qazir tergeý amaldary júrgizilip, oqiǵanyń mán-jaiy anyqtalyp jatyr.
BAQ málimetinshe, qaza tapqan er adam «Mańǵystaýmunaigaz» kompaniiasynda vahtalyq ádispen jumys istegen. Apat tasjoldyń 170–171-shaqyrymynda, aialdama mańynda bolǵan. Er adam joldy kesip ótpek bolǵan.
«Mańǵystaýmunaigaz» AQ qaza tapqan jumysshynyń týǵan-týystary men jaqyndaryna kóńil aitty.
