Qazaqstan prezidenti Qasym-Jomart Toqaev Aziia oiyndarynda jeńisinen aiyrylǵan jeńil atlet Iasmina Toqsanbaevany «Eren eńbegi úshin» medalimen marapattady. Sportshy buǵan deiin Japoniiada ótken jarysta márege birinshi bolyp jetkenimen, aiaqkiimine qatysty daý saldarynan nátijesi esepke alynbaǵan edi, dep habarlaidy dalanews.kz.
Memleket basshysynyń 9 qarashada qol qoiǵan jarlyǵyna sáikes, Iasmina Toqsanbaeva XX jazǵy Aziia oiyndaryndaǵy joǵary sporttyq jetistikteri úshin memlekettik nagradaǵa ie boldy. Ol marapattalǵan sportshylardyń qatarynda boldy.
Eske salaiyq, 27 qyrkúiekte qazaqstandyq sportshy Japoniiada ótken Aziia oiyndarynda 42,195 shaqyrymdyq marafondyq sporttyq júristi 3 saǵat 22 minýt 20 sekýndta aiaqtap, birinshi bolyp márege jetken. Alaida jarystan keiin onyń aiaqkiimine qatysty narazylyq túsip, tekserý nátijesinde sportshy paidalanǵan model World Athletics uiymy bekitken tizimde joq ekeni anyqtalǵan.
Osydan keiin halyqaralyq talaptarǵa sáikes, onyń nátijesi jaramsyz dep tanylyp, altyn medal Qytai sportshysyna berildi.
Qazaqstan jeńil atletika federatsiiasy sportshynyń aiaqkiimi jarys bastalǵanǵa deiin tekserilip, startqa shyǵýyna ruqsat berilgenin málimdegen. Federatsiia sheshimge qatysty narazylyq pen shaǵym joldaǵanyn aityp, Iasminaǵa chempionǵa tiesili syiaqyny óz qarajaty esebinen tóleýge ýáde bergen.
Sportshy keiingi suhbatynda osy kezeńniń ózi úshin psihologiialyq turǵydan aýyr bolǵanyn jetkizdi. Onyń aitýynsha, endigi maqsaty – álem chempionatyna qatysý normativin oryndap, kelesi jylǵy jarysta óner kórsetý.
