Ulytaý oblysynda Qazaqstan Respýblikasynyń Prezidenti Qasym-Jomart Toqaevtyń 2026 jylǵy 28 qazandaǵy «Jańa tarihi kezeńdegi Qazaqstannyń ózekti mindetteri» atty Qazaqstan halqyna Joldaýynyń negizgi baǵyttaryn túsindirýge arnalǵan respýblikalyq aqparattyq-túsindirý tobynyń óńir turǵyndarymen kezdesýi ótti, dep habarlaidy dalanews.kz.
Is-sharaǵa Quryltai depýtaty Darhan Ahmadiev, Eńbek jáne halyqty áleýmettik qorǵaý vitse-ministri Eldar Kúzenbaev jáne Halyq keńesiniń múshesi Amanjol Áltai qatysty.
Kezdesý barysynda qatysýshylar Memleket basshysy aiqyndaǵan basym baǵyttardy, atap aitqanda, tsifrlyq transformatsiia, jasandy intellektini damytý, halyqtyń ál-aýqatyn arttyrý, jumyspen qamtýdy qamtamasyz etý, áleýmettik infraqurylymdy jetildirý jáne adami kapitaldy damytý máselelerin talqylady.
Joldaýda júktelgen mindetterdi Ulytaý oblysynyń ekonomikalyq jáne áleýmettik áleýetin eskere otyryp júzege asyrýǵa erekshe nazar aýdaryldy.
Quryltai depýtaty Darhan Ahmadiev atap ótkendei, Prezident Joldaýy el ekonomikasyn nyǵaitýǵa, azamattardyń ómir súrý sapasyn arttyrýǵa jáne memlekettik basqarý júiesin jetildirýge baǵyttalǵan strategiialyq damý baǵdarlaryn aiqyndaidy.
Mańyzdy baǵyttardyń biri – áleýmettik infraqurylymdy jańǵyrtýdy kózdeitin «Halyqtyq qurylys» baǵdarlamasyn iske asyrý. Baǵdarlama aiasynda bilim berý, densaýlyq saqtaý, sport jáne mádeniet nysandaryn salý, sondai-aq qosymsha jumys oryndaryn ashý qarastyrylǵan.
Kezdesýge qatysýshylar halyqty áleýmettik qoldaý, meditsina qyzmetkerleriniń eńbekaqysyn arttyrý, bilim berý júiesin damytý jáne pedagogterge túsetin ákimshilik júktemeni azaitý máselelerine de erekshe kóńil bóldi.
Talqylaý barysynda ekonomikanyń túrli salasyn tsifrlandyrý men zamanaýi tehnologiialardy engizýdiń mańyzdylyǵy atalyp ótti. Ulytaý oblysy úshin sý resýrstaryn utymdy paidalaný, ónerkásipti jańǵyrtý jáne tsifrlyq infraqurylymdy damytý máseleleri airyqsha ózekti.
Sonymen qatar óńir ekonomikasyn ártaraptandyrý, investitsiia tartý, shaǵyn jáne orta biznesti qoldaý, týrizmdi damytý jáne jastar úshin jańa jumys oryndaryn ashý perspektivalary qarastyryldy.
Ulytaý oblysynda birqatar iri áleýmettik jáne infraqurylymdyq jobany júzege asyrý jumystary bastalyp ketti. Memleket basshysy Qasym-Jomart Toqaevtyń tapsyrmalaryna sáikes jáne Úkimettiń qoldaýymen 30-ǵa jýyq nysandy jańǵyrtý qolǵa alyndy. Bul jobalar injenerlik infraqurylymdy jańartýǵa, halyqtyń ómir súrý sapasyn arttyrýǵa jáne óńirdiń odan ári damýyna qolaily jaǵdai jasaýǵa baǵyttalǵan.
Oblystyń damýynda kólik infraqurylymy mańyzdy oryn alady. Memleket basshysynyń tapsyrmasy boiynsha «Samuryq-Qazyna» AQ Jezqazǵan jáne Qarajal qalalaryndaǵy, Jańaarqa aýdanyndaǵy jáne Qyzyljar stantsiiasyndaǵy tórt temirjol vokzalyn jańǵyrtty. Jańartylǵan nysandar qaita paidalanýǵa berilip, jolaýshylarǵa qyzmet kórsetýde.
Óńir úshin Jezqazǵan – Qyzylorda jáne Jezqazǵan – Arqalyq avtomobil joldarynyń qurylysyn aiaqtap, paidalanýǵa berý erekshe mańyzǵa ie. Bul jobalar kólik qatynasyn jaqsartýǵa, júk jáne jolaýshylar tasymalyna qolaily jaǵdai jasaýǵa, sondai-aq saýda-ekonomikalyq bailanystardy keńeitýge múmkindik beredi.
Sonymen qatar Jezqazǵan – Qaraǵandy avtomobil jolynyń qurylysy jalǵasýda. Jol jelisin damytý oblystyń kólik-logistikalyq áleýetin nyǵaityp, investitsiialyq tartymdylyǵyn arttyrýǵa yqpal etedi.
Densaýlyq saqtaý salasynda da aýqymdy jumystar atqarylýda. Ulytaý aýylynda 20 tósek-oryndyq aýrýhana men bir aýysymda 100 adam qabyldaýǵa arnalǵan emhananyń qurylysy júrgizilýde. Nysandy osy jyldyń sońyna deiin paidalanýǵa berý josparlanǵan.
Jezqazǵan qalasynda «Zhyly Zhurek» qorynyń qoldaýymen biylǵy shilde aiynan bastap bir aýysymda 250 adam qabyldaityn jańa emhana salynyp jatyr.
Sondai-aq oblys ortalyǵynyń meditsinalyq infraqurylymyn jańǵyrtý aiasynda onkologiialyq korpýs pen perinataldyq ortalyq salý kózdelgen. Qurylys-montaj jumystaryn jaqyn arada bastaý josparlanyp otyr.
Budan bólek, «Samuryq-Qazyna» AQ-men qol jetkizilgen kelisimder aiasynda Jezqazǵanda balalarǵa arnalǵan inkliýzivti ońaltý ortalyǵy men zamanaýi inkliýzivti sport keshenin salý josparlanýda.
Óńirdiń sport, mádeniet jáne áleýmettik infraqurylymyn damytý jumystary da jalǵasýda. Atap aitqanda, «Qarmet» AQ Qarajal qalasynda balabaqsha salýdy josparlap otyr. Al «Qazaqmys» korporatsiiasy 2027 jyldyń birinshi jartyjyldyǵynda Jezqazǵanda 800 oryndyq Kongress-ortalyqtyń, tennis ortalyǵy men jańa stadionnyń qurylysyn bastaýdy kózdep otyr.
Atalǵan jobalardy júzege asyrý infraqurylymdy damytýǵa, turǵyndar úshin jańa múmkindikter jasaýǵa jáne Ulytaý oblysynyń áleýmettik-ekonomikalyq áleýetin nyǵaitýǵa baǵyttalǵan.
