Qyrǵyzstanda taýǵa júgirý jarysyna qatysýǵa barǵan 14 jastaǵy jasóspirim qaiǵyly jaǵdaida kóz jumdy. Uiymdastyrýshylar jasyna bailanysty jarysqa jibermegen soń, ol taýǵa jalǵyz kóterilip, adasyp ketken, dep habarlaidy dalanews.kz.
Qaiǵyly oqiǵa Bishkek qalasyna jaqyn ornalasqan Ala-Archa tabiǵi parkinde bolǵan. Úsh kún boiy izdestirilgen Amir Kýnakýnovtyń denesi 9 qarasha kúni saǵat 16:00 shamasynda Elektro shyńynyń mańynan tabyldy.
Aldyn ala málimet boiynsha, jasóspirim sýyqtan úsip, dene temperatýrasynyń tómendeýi saldarynan qaitys bolýy múmkin.
Jarysqa jiberilmegen soń taýǵa jalǵyz ketken
Belgili bolǵandai, 7 qarasha kúni tańerteń Amir úiinen Ala-Archa tabiǵi parkinde uiymdastyrylǵan taýǵa júgirý jarysyna qatysý úshin shyqqan.
Alaida uiymdastyrýshylar onyń jasy talapqa sáikes kelmeitinin aityp, jarysqa qatysýyna ruqsat bermegen.
Osydan keiin jasóspirim óz betinshe Adygene shatqalyna qarai baǵyt alǵan.
Kýágerlerdiń aitýynsha, sol kúni tústen keiin balany «Elektro» dep atalatyn turaq mańynan kórgender bolǵan.
Qutqarýshylarǵa ózi habarlasqan
Qyrǵyzstan Tótenshe jaǵdailar ministrliginiń málimetinshe, 7 qarasha kúni saǵat 19:02-de Amir 112 nómirine qońyraý shalyp, taýdan túsip kele jatqanda adasyp ketkenin habarlaǵan.
Qutqarýshylar jasóspirimmen bailanysyp, onyń geolokatsiiasy arqyly qai jerde júrgenin anyqtaǵan. Belgili bolǵandai, ol Elektro shyńynyń mańynda bolǵan.
Alaida kóp uzamai balamen bailanys úzilgen.
8 qarashada izdeý jumystaryna qosymsha qutqarý bólimsheleri men alpinister jumyldyrylǵan.
Al 9 qarashada Qyrǵyzstan Ministrler kabineti tóraǵasy Adylbek Qasymaliev arnaiy onlain keńes ótkizip, jasóspirimdi izdeý jumystaryn kúsheitýdi tapsyrǵan.
Osydan keiin izdestirý sharalaryna tikushaq ta tartylǵan.
Ókinishke qarai, sol kúni tústen keiin qutqarýshylar jasóspirimniń denesin taý arasynan tapty.
Ólimniń aldyn ala sebebi belgili boldy
Alǵashqy málimetterge sáikes, 14 jastaǵy Amir Kýnakýnovtyń qazasyna denesiniń qatty tońýy sebep bolýy múmkin.
Degenmen onyń naqty neden qaitys bolǵany tiisti tekserý nátijesinde anyqtalady.
Aita keteiik, Ala-Archa – Bishkek qalasyna jaqyn ornalasqan, týrister men alpinister jii baratyn tabiǵi park. Munda taý joryqtary men júgirý jarystary ótkizilip turady.
