Quny 2,5 mlrd teńgeden asatyn aktivteri bar Kókshetaýdaǵy jumys istep turǵan sút zaýyty Resei azamaty Artem Kretsýmen bailanysty kompaniiaǵa nebári 50 myń teńgege berilgen. Kelisim kásiporyndy qarjylyq saýyqtyrý jáne óndiristi qalpyna keltirý jónindegi mindettemeler aiasynda jasalǵan. Alaida sot mámileni jaramsyz dep tanydy, al kásiporyndaǵy úleske quqyqty alý jaǵdaiyna bailanysty qylmystyq is tergelip jatyr. Osy kezde Artem Kretsý Reseidiń Omby qalasynda jańa iri sút zaýytynyń qurylysyn bastaýǵa nietti, dep habarlaidy dalanews.kz.
Áńgime «Agroprodýkt» tobyna kiretin sút óńdeý kásiporyndary týraly bolyp otyr. Artem Kretsý bul topqa investor retinde kelgen. Almaty, Kókshetaý jáne Soltústik Qazaqstan oblysyndaǵy kásiporyndardy qamtyǵan ramalyq kelisimge sáikes, investor zaýyttardy qarjylyq saýyqtyrý, qaryzdaryn óteý jáne óndiristi qaita qalpyna keltirý jónindegi mindettemelerdi óz moinyna alǵan.
Milliardtaǵan aktiv — simvolikalyq baǵaǵa
2026 jylǵy 3 aqpanda «Kókshetaý sút zaýyty Belogore» JShS jarǵylyq kapitalyndaǵy 100 paiyz úles «KazAgroCapital» JShS-ne 50 myń teńgege berilgen.
Al kásiporyn aktivteriniń aldyn ala baǵalanǵan quny 2,5 mlrd teńgeden asady. Mundai simvolikalyq baǵanyń ózindik sebebi bolǵan. Burynǵy menshik ieleriniń aitýynsha, mámileden túsken qarjy olardyń qaltasyna emes, kásiporynnyń ózine salynyp, zaýytty saýyqtyrý men damytýǵa baǵyttalýy tiis bolǵan.
Alaida burynǵy menshik ieleriniń málimdeýinshe, ýáde etilgen qarjylyq saýyqtyrý júzege aspaǵan. Osylaisha korporativtik daý sotqa deiin jetti. 2026 jylǵy 21 shildede Almaty qalasynyń Mamandandyrylǵan aýdanaralyq ekonomikalyq soty jarǵylyq kapitaldaǵy 100 paiyz úlesti satyp alý-satý týraly shartty jaramsyz dep tanyp, ekijaqty restitýtsiiany qoldandy. Iaǵni taraptardy mámile jasalǵanǵa deiingi bastapqy jaǵdaiǵa qaitarý týraly sheshim shyǵaryldy.
Sot óz sheshiminde shamamen 2,5 mlrd teńgege baǵalanǵan aktivtiń 50 myń teńgege berilýi derbes ekonomikalyq maǵynaǵa ie bolmaǵanyn jáne bul kádimgi biznesti satyp alý-satý mámilesine jatpaitynyn atap ótken.
Degenmen bul sheshim ázirge zańdy kúshine engen joq. Artem Kretsý sot sheshimine apelliatsiialyq tártippen shaǵym túsirgen.
Qatarynan qylmystyq is te tergelip jatyr
Ekonomikalyq daýmen qatar Almaty qalasynyń Politsiia departamentinde kásiporynnyń jarǵylyq kapitalyndaǵy 100 paiyz úleske alaiaqtyq jolmen zańsyz quqyq alý faktisi boiynsha qylmystyq is tergelip jatyr.
Tergeý Qazaqstan Respýblikasy Qylmystyq kodeksiniń 190-baby 4-bóligi 2-tarmaǵy boiynsha júrgizilýde. Sotqa deiingi tergep-tekserý materialdarynda Kretsý A.R. aty atalady.
Bul rette sotqa deiingi tergep-tekserý derekteri jariia etilmeitinin jáne barlyq qatysýshylardyń áreketine túpkilikti quqyqtyq baǵany tek sot qana bere alatynyn atap ótken jón.
Al Qazaqstandaǵy kásiporyndar, burynǵy menshik ieleriniń aitýynsha, áli kúnge deiin ýáde etilgen jańǵyrtý men óndiristiń tolyq qalpyna kelýin kútip otyr. Osy ýaqytta Artem Kretsýdyń esimi Reseidegi jańa iri sút jobasyna qatysty jańalyqtardan kórindi.
Jańa sút zaýyty — endi Ombyda
2026 jylǵy 9 qazanda Omby oblysynyń gýbernatory Vitalii Hotsenko óńirde jańa sút zaýytyn salý jospary týraly málimdedi. Jobanyń quny 5 mlrd rýblden asady.
DairyNews salalyq basylymynyń habarlaýynsha, jobanyń investory — Leningrad oblysynda tirkelgen «Mol Frost» JShQ. Kompaniianyń quryltaishysy ári bas direktory retinde Artem Kretsý kórsetilgen.
Bir qyzyǵy, Reseidiń keibir basylymdary bul jobany «Qazaqstannan kelgen investormen» bailanystyrady. Alaida Artem Kretsý — Resei Federatsiiasynyń azamaty.
Sondyqtan jaǵdai birqatar zańdy suraq týyndatady: Qazaqstanda reseilik investor otandyq sút kásiporyndaryn qarjylyq saýyqtyrý jónindegi mindettemeler aiasynda olardyń aktivterin basqarýǵa kelse, jańa aýqymdy jobasyn Resei aýmaǵynda júzege asyryp jatyr.
Qazaqstandyq zaýyttardyń jabdyqtary qaida?
Osy jaǵdaiǵa bailanysty kásiporyndardyń burynǵy menshik ieleri óndiristik aktivterdiń saqtalýyna alańdaýshylyq bildirýde. Olar Qazaqstandaǵy sút zaýyttarynyń jabdyqtary el aýmaǵynan shyǵarylyp, jańa jobalarda paidalanylýy múmkin degen qaýip bar ekenin joqqa shyǵarmaidy. Alaida qazirgi tańda bul — burynǵy menshik ieleriniń alańdaýshylyǵy ǵana, tergeý nemese sot tarapynan dáleldengen fakt emes.
Degenmen múliktiń quny men jalǵasyp jatqan korporativtik daýdy eskere otyryp, burynǵy menshik ieleriniń pikirinshe, aktivterdiń saqtalýy máselesi quzyrly memlekettik organdardyń erekshe nazarynda bolýy tiis.
««Biz zaýytty aqsha úshin emes, ony saqtap qalý jónindegi mindetteme negizinde berdik. Alaida onyń ornyna sot daýy, qylmystyq is jáne Ombyda jańa zaýyt salynatyny týraly jańalyqtardy kórip otyrmyz. Bizdiń maqsatymyz — Qazaqstandaǵy jabdyq Qazaqstanda qalyp, elimizdiń ekonomikasyna jumys isteýi», — dedi kásiporynnyń burynǵy menshik ieleriniń ókili.»
Búginde jaýabyn kútken birneshe mańyzdy suraq bar
Qazaqstandaǵy sút zaýyttarynyń jabdyqtary qazir qaida jáne olardyń saqtalýyna kim jaýap beredi? Almaty, Kókshetaý jáne Soltústik Qazaqstan oblysyndaǵy kásiporyndardy qarjylyq saýyqtyrý jónindegi mindettemelerdiń taǵdyry ne boldy? Qazaqstandyq aktivterge qatysty daý áli tolyq sheshilmei jatyp, Ombydaǵy milliardtaǵan joba qalai júzege asyrylyp jatyr?
Bul saýaldarǵa Artem Kretsýdyń ózi jáne quzyrly memlekettik organdar jaýap berýi tiis.
Óitkeni áńgime jai ǵana burynǵy menshik ieleri men investor arasyndaǵy korporativtik daý týraly emes. Munda jumys oryndary, óndiristik qýattar, milliardtaǵan teńgege baǵalanatyn aktivter jáne eń bastysy — Qazaqstandaǵy kásiporyndar men olardyń jabdyqtary aldaǵy ýaqytta elimizdiń ekonomikasyna qyzmet ete me degen másele tur.
