Qazaqstannyń Energetika ministri Erlan Aqkenjenov ai saiyn 1,2 mln teńge jalaqy alatynyn jáne kommýnaldyq qyzmetterge shamamen 75 myń teńge jumsaitynyn aitty. Sondai-aq ministr Astanadaǵy Highvill turǵyn úi kesheninde turatynyn jáne bir avtoturaq ornyn jaldaitynyn málimdedi. Bul týraly ol Úkimet otyrysynan keiingi brifingte aitty, dep habarlaidy dalanews.kz.
Jýrnalister ministrden jeke tabysy men turmystyq shyǵyndary týraly suraǵan. Aqkenjenovtiń aitýynsha, onyń ai saiynǵy kommýnaldyq tólemi 73-75 myń teńge aralyǵynda.
Ministr bul somaǵa internet pen avtoturaq aqysy kirmeitinin naqtylady. Ol bir avtoturaq ornyn jaldaitynyn da aitty.
Osylaisha, 1,2 mln teńge jalaqynyń shamamen 6,25%-y kommýnaldyq qyzmetterge jumsalady. Alaida bul esepke turǵyn úidi jaldaý nemese ipoteka tólemi, internet, avtoturaq jáne basqa da turmystyq shyǵyndar kirmeidi.
Aita keteiik, búgingi Úkimet otyrysynda Aqkenjenov eldiń energetikalyq infraqurylymynyń qysqy maýsymǵa daiyndyǵy týraly da baiandady.
Ministrdiń málimetinshe, elektr stansalarynda segiz energoblok, 49 qazandyq jáne 37 týrbina jóndelgen. Óńirlik elektr jelilerinde 17,1 myń shaqyrym elektr berý jelisi men 444 qosalqy stansada jóndeý jumystary aiaqtalǵan. Sonymen qatar 377 shaqyrym jylý jelisi jóndelgen.
Jóndeý jumystaryna bólingen qarjy kólemi orta eseppen 27%-ǵa artqan. Nátijesinde elektr stansalarynyń tozý deńgeii 52%-ǵa, elektr jelileriniń tozýy 65,7%-ǵa, jylý jelileriniń tozýy 48%-ǵa deiin tómendegen. Al tehnologiialyq buzýshylyqtar sany ótken jylmen salystyrǵanda 6%-ǵa azaiǵan.
Budan bólek, ministr Qazaqstanda biylǵy jyldyń alǵashqy 10 aiynda 102 mlrd kVt·saǵat elektr energiiasy óndirilgenin aitty. Bul ótken jyldyń sáikes kezeńinen 2,3%-ǵa kóp.
